DĺLI----Xefe Estadu José Manuel Ramos Horta konsidera loron mundiál liberdade imprensa ne’e importante tebes. Tuir Xefe Estadu José Manuel Ramos Horta hatete, Parabens no hakru’uk ba jornalista hotu-hotu iha loron ida ne’e nomos hakru’uk ba jornalista hirak ne’ebe maka fo sira nia vida no mate ba rai ida ne’e tantu jornalista Timorense i Internasional.

“Ha’u hakru’uk ba jornalista sira hotu-hotu liu-liu ba sira ne’ebe maka mate ba rai ida ne’e hanesan iha Balibo V no sira seluk, tanba ne’e maka iha loron ida ohin atan ha’u haru’uk no parabens ba imi tomak,” hatete Xefe Estadu José Manuel Ramos Horta ba jornalista iha ambitu selebrasaun loron mundial liberdade imprensa hamutuk ho jornalista sira iha Palasiu Prezidente Aitarak Laran, Kuarta (03/05).

Nia hatutan, Husu ba governu tuir mai atu bele tau fila-fali iha orsamentu estadu nian hodi apoiu mídia sira iha Timor leste, la’os fo apoiu para atu buka kontrola serbisu midia ka jornalista nian lae, maibe fo apoiu atu fasilita sira nia serbisu diakliu tan, serví públiku ho informasdaun ne’ebe kredivel bazeia ba faktus no kualidade.

Xefe estadu dehan, Liu husi apoiu finanseiru ka ekipamentus nomos infraestrutura i apoiu mos formasaun iha abilidade lingua no iha parte seluk ne’ebe maka importante atu tulun serbisu mídia ka jornalista nian.

Nia haktuir, Laiha politika ka emprezariu ruma ne’ebe ke iha imunidade relasaun ba midia kona ba ninia hakerek ka ninia serbisu, nune’e mos husu ba Policia Científico de Investigação Criminal (PCIC, Sigla Portugés) mos tenke kuidadu no labele simu orientasaun ruma husi politiku sira atu ba halo investigasaun ba jornalista sira, husu idak-idak serbisu tuir ninia papel.

“Ba oin ha’u pesoalmente labele halo buat hotu-hotu iha tinan ida nia laran, tanba ha’u sei analiza buat barak hetan dokumentasaun oin-oin para oinsa bele hadia situasaun balun, agora sei iha artigu ruma husi jornalista sira nia hakerek, hanesan kanek element ruma nia bele privadu ka nia bele membru governu nia dignidade klaru no nia iha direitu para lori ba tribunal,” katak nia.

Entretantu iha eventu ba selebrasaun loron liberdade imprensa ne’e hetan partisipasaun husi Provedór Direitus Umanus no Justisa (PDHJ) Vigilio Guterres no organizasaun mídia sira hanesan TLPU, AJTL, no UPJTL nomos jornalistas ho konvidadu sira seluk. (BT)