DÍLI----Rede Koligasaun Agrikultura Timor Leste (RKATL) husu Governu tenke investe agora iha setór agrikultura no setór produtivu seluk hodi diversifika ekonomia nasional, labele garantia ba fundu petrolíferu, tanba fundu petrolíferu sei hotu iha tempu besik.

Tuir Porta-voz RKATL, Hermina de Jesus Pinto, Hatete, Rede Koligasaun mak rede ida ne’ebé hodi envolve agrikultor sira hanesan, grupu, Ema ho Defisiensia, Setór Privadu, Grupu Feto iha Agrikultura, Organizasaun iha Juventude, LGBTI, Grupo Kooperativa, Movimentu Sosial, Organizasaun Sosiedade Sivil no grupu sira seluk ne’ebé iha interese atu dezenvolve setór agrikultura no promove ekonomia diversifikada ne’ebé sustentável no inkluzivu ihaTimor Leste.

Rede koligasaun ne’e konkorda hodi harii no estabelese sentru Mídia iha sekretariadu sede Hasatil iha farol, hodi monitoriza, akompaña no halo advokasia ba diskusaun kona ba proposta Orsamentu Jerál Estadu (OJE) tinan 2022 nian. Nune’e, sentru ida ne’ sei fasilita espasu ba ema no organizasaun sira, atu fó sira nia hanoin no akompaña debate kona ba OJE tinan 2022 nian iha Parlamentu Nasional (PN).

“Husu ba Parlamentu Nasional (PN) no governu, atu halo debate klean, matenek no kuidadu hodi konsidera situasaun real ne’ebé mak agora dadauk Ita-nia Rai Timor Leste hasoru,” Hateten Porta-voz RKATL, Hermina de Jesus Pinto liuhusi Press Conference ba jornalista sira iha sede Hasatil Farol-Díli, Kinta (25/11).

Porta-voz hatutan, Proposta OJE ba tinan 2022, despeza estadu ne’ebé la sustentável no la realistiku sei fó risku boot ba sustentabilidade reserva fundu petrolíferu no finansas publiku iha futuru oin mai, bainhira Timor Leste la iha ona reseita husi kampu mina no gas ne’ebé ita iha. “Realidade publiku hatene, fundu pretrolíferu sei hotu iha tempu besik, tan ne’e governu tenke investe agora iha setór agrikultura no setór produtivu seluk hodi diversifika ekonomia nasional,” Tenik nia.

Nia dehan, Sentru mídia sei kontinua realiza konferénsia imprensa, programa TV show, hodi prepara esteatmentu konjunta no diskusaun nakloke ho Jornalista sira, kona ba análiza OJE ba tinan 2022 no aktividade importante sira seluk.

Nia Hakotu, Sentru mídia refere lansa ka funsiona hahu husi inísiu diskusaun proposta OJE tinan 2022, iha fulan Dezembru tinan ida ne’e sei kontinua monitoriza Ezekusaun Orsamentu Jerál Estadu (OJE), ne’ebé hetan aprovasaun husi Parlamentu Nasional (PN) no promulga husi Prezidente Repúblika (PR). (BT)