DÍLI----Inan faluk, Domingas da Costa ho idade-65, husi Munisipiu Manatuto, Postu administrativu Laklubar, loron la’o ba mai iha Dili laran hodi buka kalen a'at atu fa'an ka tetu hodi sustenta nesesidade no selu oan nia eskola.

Inan faluk sai husi uma dadeer madrugada iha tuku 5 liu minutu balu hodi haleu sidade Dili laran atu hili kalen a'at to'o kalan, maske loron manas maibe la senti kolen hodi buka lata atu tetu hodi hetan netik osan atu bele sustenta nesesidade uma loron-loron nian.

Ha’u loro-loron sai husi uma hodi buka lata a’at sira ne’ebe mak ema soe iha lixu laran hodi tetu buka osan atu oinsa bele sustenta nesesidade loron kalan nian nomos selu ha’u-nia oan nia eskola,” Hateten Inan faluk, Domingas da Costa ba jornalista BT, iha Area Fomento, Sexta (19/11)

Nia hatutan, Loron-loron sai husi uma hili kalen a’at tau hamutuk to’o loron haat ka lima foin mak ba tetu, selae ema mai tetu iha uma deit no tetu kada saku 35 kg ida bele hetan $3-$4.50. “Kalen ne'ebe hau hili liu loron ha'at ka Lima tau hamutuk mak foin ba fa'an sela'e ema mai hola ka tetu iha uma de'it, sira tetu kalen ne'e saku 30kg ida ka rua hetan osan $3 to'o $4,50 sentavu,” Dehan nia.

Nia dehan, Kaben mate desde tempu Indonezia nia ne'ebe husik hela nia ho oan mane ida, ne'ebe servisu seluk ba hau laiha no hau foti desizaun hodi hili kalen a'at, tanba ne'e hau ho oan hela mesak laiha familia ida mak tau matan mai ami nain rua. “Osan ne'ebe hau hetan hodi sosa fos, mina no sustenta oan nia eskola no seluk tan, maibe hau senti osan hirak ne'e hodi sosa sasan uma laran mos la to'o ida no esforsu hili nafatin kalen tan de'it oan nia futuru no nesesidade uma laran obriga tenke buka osan,” Katak nia.

Agora dadaun hau-nia oan eskola iha SD Ai-Mutin klase 2 ano, maibe moris nu'udar inan faluk pasiensia hodi hasoru dezafiu moris loro-loron nian,” Afirma nia. (BT)