DILI----Governu da Ualu liuhusi Ministeriu Ensinu Superior Siensia no Kultura (MESSK) ne’ebe mak kria politika edukasaun ba estudante sira liuhusi eskola ba uma ka oinline la fo benefisiu ba estudante sira iha ensinu superior tanba rede internet la’o lentu tebes.

Tuir Xefi Akademiku, Institute Of Busines (IOB), Antonio Soares Martins, hatete, Prosesu Aula online lafó benefísiu ba estudante sira tamba kauza hosi rede internet ladun diak.

‘‘Durante pandemia covid 19 hahu kedan husi 2020 mai, atividade prosesu aprendizazen prezensial paradu, lao duni iha aula online maibe ladún fo benefísiu ba estudante sira, tanba rede internet ne’ebe ladún diak,” Hateten Xefi Akademiko, Institute Of Busines (IOB), Antonio Soares Martins iha nia knaar fatin Kampus (IOB), Fomento II, Dili, Kuarta (17/11)

Xefi akadémiku hatutan, Aula online la fo benefísiu ba estudante sira tamba estudante balun la uza telefone android hodi nune’e la asesu ba aula online depois rede internet mos la’o lentu, entaun estudante sira mos lasente aulas online ninia benefisiu.

Mezmu aulas online ne’e todan liu fali ba hanorin nain sira tanba tenki prepara hanesan modul, power point, tenki prepara lisaun sira hodi fo ba estudante sira, nune’e aula prezensial reativa fila-fali iha juñu 2020 lao normal maibe kontinua hala’o ho aula online iha loron 15 fulan abril tinan 2021 tanba iha situasaun ida ne’ebe maka perigoju liu hodi tama ba ita-nia Serca Sanitaria ho Konfinamentu Obrigatóriu entaun husi ida ne’eba actividade hotu-hotu labele lao liu-liu actividade aprendisazen aula prezensial.

“Relasiona pandemia covid-19 entaun prontu iha ne’eba ita kontinua lao ho aula online to loron 2 fulan Agustu 2021 continua lao ho aula tinan 2021,’ Afirma nia.

Iha sorin seluk, Estudante, Estefania de jesus, haktuir aula online sente todan tamba la kompriende materia liu husi via online ne’ebe manorin sira fo mai ami, kada ves ami la tuir aula online tamba rede internet ne’ebe la dun suficiente ho nune’e ami estudante la seguru hodi aprende.

“Iha covid 19 ne’e liu-liu serka sanitaria no konfinamentu obrigatoriu nia laran, dezafius barak ami estudante sira enfrenta tamba dala ruma ami halo trabalhu ruma,la kumpriende atu halo ho nune’e ami gastu pulsa barak atu husu manorin sira hodi esplika fila fali,” Relata nia. (BT)