DÍLI----Klínika Diresaun Veterinária, Ministériu Agrikultura no Peska (MAP) iha fulan agusto konsege rejista moras moras animal hamutuk-27. Médiku Veterinária iha Klínika Diresaun Veterinária, Ministériu Agrikultura no Peska (MAP), Frederico Amaral , Informa, Durante fulan Outubru nia laran, klínika konsege rejistu moras animal hamutuk-27, barak liu mak animal asu.

“Klínika ida ne’e loke ho intensaun atu atende ba komunidade liu-liu ba komunidade sira iha Dili laran, ba sira ne’ebé mak hakiak animal, animal estimadu sira hanesan asu ho busa no dala barak sira mós lori ho animal sira seluk mai konsulta iha ne’e, karik animal hetan moras, entaun diresaun fó atendimentu ba sira-nia animal hirak ne’e, normalmente mak animal asu, busa no dala ruma sira lori fahi no animal fuik, hanesan bibi rusa no lekirauk,” Hateten Médiku Veterinária, Frederico hato’o ba jornalista BT, iha nia knaar fatin Comoro-Dili, Tesra (16/11).

Frederico hatutan, Animal sira ne’ebé mak kliente sira lori mai ne’e, barak liu mak ema estranjeiru, hanesan Cineza, Japonés no Indonéziu, Timor ema ladún iha tanba sira seidauk hatene servisu Diresaun Klínika Veterinária nian, liu-liu ba atendimentu ba animal moras.

Portantu, animal hirak ne’ebé mak hetan moras iha fulan Outubru nia laran mak hanesan, animal asu, karau, bibi no fahi, ne’ebé mak rejista hamutuk 27, iha ne’e animal moras barak liu mak animal asu ho nia total moras hamutuk-10, karau-9, bibi-4 no fahi-4.

Animal asu hetan moras parazita ne’ebé hatudu nia sintoma mak hanesan, Diarreia, tilun kanek, kutun barak, vontade han la iha no muta, ne’ebé mak sei kauza ba animal nia isin sei tu’un no bele mate, karau afeta moras parazita internal no telazia, sintoma vontade han la iha, matan malahuk, isin kanek iha parte kakorok, kaskadu, animal bibi hetan parazita, ne’ebé kanek iha parte glándula mamália (susun), matan te’en sai, vontade han la iha, kaskadu no ba fahi hatudu sintoma vontade han la iha. Nia hateten.

Animal hirak ne’e, Klínika Veterinária halo tratamentu fó ai-moruk anti parazita, antibiótika no vitamina ba animal refere mak hanesan, B. Complex, Albendazole, Intramox, Ivermectin, Perimectin, Abendiso, Penestrep, Gusanex, Oxitetracicline no Piramectin.

Ai-moruk sira iha Ministériu Agrikultura no Peska liu hosi Diresaun Nasionál Veterinária (DNV), sira halo tenderizasaun, tanba ida ne’e Governu nian ne’ebé buat hotu-hotu tenke liu hosi tender, kompañia hatama ai-moruk mai Timor hafoin Governu selu liu hosi Diresaun Nasionál Veterinária (DNV), normalmente kompañia Boaventura, ai-moruk hirak ne’e dala barak hatama hosi Indonesia, Australia no Malaysia.

Nia informa, Durante halo atendimentu iha klínika veterinária seidauk rejista animal mate, dala ruma sira kleur liu lori animal mai, entaun to’o iha ne’e animal mate ona, no kliente sira lori animal moras mai iha klínika halo tratamentu hotu sira lori fila ba uma depois sira mós la fó informasaun mai ami, iha balu mak fó informasaun katak ami hakarak kontinua tan, tanba animal nia isin sei fraku hela, maibé animal asu diak ona, animal mate tanba animal moras kleur ona iha uma maibé sira la lori mai lalais, entaun sira lori mai to’o iha klínika animal mate ona, animal mate iha klínika seidauk iha, esperiénsia ne’ebé ha’u iha mak animal mora sira uma kleur ona sira lori to’o mai iha ne’e animal mate.

“Kuandu ami halo tratamentu ba animal ne’ebé mak moras, sempre rekomenda ba sira la bele konsumu naan ka animal ne’ebé mate ona, tanba iha lei animal iha ben-star animal nian sempre dehan animal nia liberdade sei la hetan moras, kuandu animal moras mak ita halo tratamentu animal ne’e mate la rekomenda ba animal nain atu han fali naan, tanba naan kontamina ona antibiótika”. Frederico rekomenda ba hakiak nain sira.

Nu’udar Médiku Veterinária husu ba komunidade sira katak klínika veterinária ne’e Governu nia loke ba ema hotu no foresee gratuita, ne’ebé iha vasina no iha ai-moruk, halo atendimentu ba animal moras bele mai iha klínika, atu atu fó ai-moruk ami sei la fó ba sira, tanba sira laos médiku no sira laos para-médiku. (BT)