DÍLI----Ministru Edukasaun Joventude no Desportu (MEJD) Armindo Maia, Hatete Parte Ministeriu Edukasaun Joventude no Desportu (MEJD) seidauk iha lei ruma atu fo sansaun ba estudantes ne’ebé ho idade 12 too 17 la simu vasina Pfizer.

“Parte MEJD la iha sansaun ida tenki prega ba labarik sira ho idade 12 too 17, kuandu la simu vasina tanba sira sei kiik ne’ebé kontinua tuir nafatin atividade aula prezensial nomos ezame pasajem,” Hateten Ministru Edukasaun Joventude no Desportu (MEJD) Armindo Maia ba jornalista sira iha eskola Ensinu Báziku Sentral (EBC-sigla portugés) 30 Agostu Komoro Díli, Kuarta (27/10).

Maske governu liu husi Ministeriu Saúde (MS) no MEJD iha meta ba programa vasina ne’e hodi proteje sidadaun husi Covid-19, maibé la kria regra rigorozu hasoru labarik sira ho kondisaun maibé nafatin motiva estudante sira hodi simu vasina.

“Governu sira esforsu hodi esplika ba inan-aman sira katak vasinasaun ne’e diak ba oan sira no vasinasaun ne’ebé ohin lansa iha eskola 30 Agostu , governu laos halo desizaun kalan ida mehi no deside ona, maibé lori tempu naruk, tanba hetan aprovasaun husi organizasaun saúde mundial, tanba Ti mor-Leste hakarak hola parte ba iha vasina Pfizer,” dehan Armindo

Iha sorin Seluk, Diretor Eskola EBC 30 Agostu Komoro, Filomeno Salsinha, Hatutan, Eskola ida ne’e iha lista estudante ho idade 12 too 17 hamutuk 2.200, ne’ebé estudante nain-10 mak hetan ona vasina. “Iha estudante lubuk ida mak preparadu atu simu vasina Pfizer tanba sira nia inan-aman asina ona formulariu husi MS espera katak estudante 2.000 resin ne’e bele hetan hotu vasinasaun,,” Haktuir Diretor Eskola EBC 30 Agostu Komoro, Filomeno Salsinha. (BT)