KOVALIMA----Iha loron sabadu (16/10/2021) mais-menus iha oras 10:30 pekadór, Marito Magno ho idade-44 tama halo peskas iha Tasi mane Lihu-Wai Suai-Covalima hetan ta’a mate husi Lafaek tanba iha loron domingu (17/10) matebian sai hosi uma ba kail lafila foin familia sira ba buka tuir hetan deit matebian nia isin rahun deit tanba lafaek han halo isin lolon sira rahun hotu.

Tuir Matebian Marito Magno nia kaben, Guilermina Rani Suriati, Hatete, Matebian Marito sai husi uma iha loron Sabadu tuku 10:30 dader ba kail ikan iha tasi Lihu-Wai haree ba oras komesa lao bebeik, loro matan mos komesa tun ba bebeik, kalan to'o fali domingu dader mos nunka mosu maibe matebian ka fila tanba hetan tata ona hosi Lafaek.

“Matebian sai husi uma ne'e dehan atu ba kail ikan nia mesak mak lao ba iha loron Sabadu tuku 10 dader ne'e, entaun Domingo nia la fila, ha’u ba buka nia mos la hetan, ha’u fila-fali mai fo hatene nia feton sira haruka ema buka deit maka horiseik maka hetan mas matebian nia isin lolon la kompletu ona tanba lafaek han hotu hela isin rohan ida,” Konta tuir, Matebian Marito Magno nia kaben, Guilermina Rani Suriati ba jornalista sira iha nia residensia Beko, Segunda (18/10).

Nune’e, Matebian Marito Magno nia kaben, Guilermina Rani Suriati ho mataben tanba lakon ona ema ne'ebe iha responsabilidade ba nesesidade iha sira familia laran. “Hau sente triste tanba lakon ona hau-nia laen ne'ebe diak, durante ne'e ami moris ho peskador entaun kuando nia lakon ona iha ami-nia leet, ami atu halo nusa,” Dehan Guilermina ho matan ben.

Enkuantu, Cesaltino Assa Soro, Hatutan, Matebian Marito Magno nia mate fatin dok husi uma mais ou menus kilometru tolu tanba familia hamutuk ho komunidade suku Beko inklui lider komunitaria hahu buka iha Loron Sabadu (16/10) loraik maibe la konsege hetan, to'o Loron Domingu horiseik (17/10) mais ou menus tuku 10 dadersan hau (Cesaltino Assa Soro) maka hetan nia isin rahun hafoin halolo lian ba natureza.

“Nia mate fatin ne'e dok kilometru tolu hansane Loron Sabadu ne'e ami buka nia maibe la hetan, entaun horiseik ami Komunidade iha ne'e sai hotu kedas ba buka matebian, agora ida ne'e mos la hetan, agora hau hetan sapeo entaun hau halolo lian, depois avo lafaek ida mosu mai, maibe lakon fali, entaun derepente nia isin rohan ida hau hetan iha kolam ne'e, entaun hau hodi ai oan hau hasai nia isin rohan ne'e, ne'ebe ami hetan ne'e tuku 10 horiseik dadersan” Afirma Cesaltino Assa Soro. Marito Magno mate husik hela nia kaben Guilermina Rani Suriati ho nia oan Mane nain ida ho tinan 12. (BT)