DÍLI----Forum Organizasaun Naun Governamental Timor-Leste (FONGTIL), realiza dialogu ho Membru Governu no paralamentu sira atu oinsa hato’o serbisu rekomendasaun dezafiu ne’ebé sosiedade sivil sira deskobre kona ba Partisipasaun feto iha vida polítika negosiu no kna’ar profisional kontribui ba eliminasaun violensia hasoru feto no labarik feto.

“Objetivu husi dialogu ida ne’e atu koalia kona ba feto, ne’ebé haree liu ba violensia kontra feto no labarik feto sira, ho tema husi dialogu ida ne’e mak, Partisipasaun feto iha vida polítika, negosiu no kna’ar profisional kontribui ba eliminasaun violensia hasoru feto no labarik feto,” Hatete, Diretor Ezekutivu Forum Organizasaun Naun Governamental Timor-Leste (FONGTIL), Daniel Santos do Carmo ba Jornalista sira iha Edifisiu Comisaun Nasional de Eleisoens (CNE) Dili, Sesta (08/10)

Nia hatutan ONG forum halo kna’ar ida oinsa atu fasilita komunikasaun entre organizasaun sosiedade sivil ho Governante sira liu husi forum dialogu. Entaun ita konvida Governante sira no parlamentu mai atu fasilita membru sira hanesan redi feto no organizasaun sira ne’ebé tau matan ba feto no labarik feto sira, sosiedade sivil sira nia prezensa atu rekomenda no komunika ho Governu kona sira nia preokupasaun.

Nia dehan, Forum dialogu nia finalidade mak konsensus, signifika oinsa maka rekomdensaun sira husi sosiedade sivil ba Governu no parlamentu bele konsidera no mos sosiedade sivil bele kontinua halo nia papel hanesan parseria krítiku ho Governu. Ita halo serbisu parseria krítiku entermus peskiza dadus, informasaun no evidensia sira para ajuda parlamentu no ajuda Governu halo desizaun ne’ebé bele fó resposta ba problema ne’ebé ita enfrenta, liu-liu violensia hasoru feto no labarik feto.

“Ita hatene katak, violensia hasoru feto iha ita-nia rain ne’e rezista 38%, signifika ne’e problema ida ba ita-nia rai, atu ultrapasa ida ne’e, la’os problema Governu nian, la’os parlamentu nian maibé ne’e problema Timor nian oinsa mak entidade hanesan sosiedade sivil bele halo ninia papel atu kontribui hodi redus violensia kontra feto no labarik feto sira,” Salienta nia.

Timor-Leste iha lezislasaun lubuk ida ne’ebé proteje vitima sira husi violensia domestíka no labarik feto sira, ita iha kódigu penal no ita mos iha lei violensia domestíka, lei sira ne’e protejidu. Ita nia preokupasaun la’os ba lejislasaun ne’ebé iha ona maibé oinsa mak komprementa ba lizislasaun sira maka sai dezafiu, ida ne’e mak esforsu ida to’o ikus lei domestíka sai esforsu koletiva ne’ebé sura mos husi sosiedade sivil no redi feto nia esforsu tomak to’o ikus, lei ne’e aprovadu no promulgadu.

Agora ita iha dezafiu mak implementasaun, oinsa dezenvolvimentu sira tenke promove balansu inkluzivu para labele husik ema ida iha kotuk atu labele fó oportunidade ba violensia hodi eziste iha komunidade, ita hotu iha dever moral oinsa atu fó protesaun, liu-liu asegura implementasaun lei sira bele sensivel ba jeneru no inkluzivu.

Nia haktuir, Violensia domestika kontinua akontese iha Timor tanba investimentu husi setor públiku ba atividade ekonómiku sira ne’ebé bele fó rendimentu ba ita nia feto sira ninia independente etermus ekonómia sei menus, ne’e hanesan dezafiu ida. Dezafiu seluk mak ita ninia kultura patriarka ne’ebé kleur demais, entaun konsidera katak feto nia subordinadu mak ida ne’e, ida seluk mak edukasaun konsensializasaun ita nian rasik, oinsa mak atu respeita feto no oinsa mak atu konsiente katak, sei ita iha problema oinsa atu rezolve tuir dalan legal ne’e sei menus tanba ne’e mak violensia kontra feto sei kontinua rezista a’as, dehan nia. (BT)