DÍLI----Iha loron 25 fulan Setembru 2021, Deklarasaun Konjunta husi Estudante Timoroan iha nasaun Kamboja, Malazia, Tailandia, no Vietnam, atu enkoraja no fó Apoiu ba Eis Embaixadora Timor-Leste ba ONU Sra. Milena Pires atu Kandidata-aan ba Presidente da República RDTL 2022-2027.

“Ami, grupu estudante Timoroan iha Kamboja, Malazia, TailandianoVietnam, hato’o ami-nia intensaun atu enkoraja no apoia ba eis-embaixadora Timor-Leste ba ONU, Sra. MILENA PIRES, atu kandidata-an ba Presidente da República RDTL períodu 2022-2027. Tempu to’o ona atu ita Timoroan propoin figura foun ne’ebé bele lori esperansa foun ba foin-sa’e sira,” Hateten grupu estudante Iha estranjeiru liu husi sira komunikadu imprensa via Email ba Jornal Business Timor, Kuarta (29/09)

Iha komunikadu hatutan, Hanesan foin-sa’e, ami orgullu sai Timoroan no onradu reprezenta rai doben iha nasaun estranjeiru. Maske la fásil e liu husi difikuldade oi-oin, ami uza oportunidade sira ne’e hodi bele avansa ami-nia estudu no kapasita ami-nia an ho objetivu atu dezenvolve ita-nia rai. Maibé, hare’e ba krize sosiál, polítika no ekonómika iha nível alarmante iha ita-nia rai laran, ami sente iha obrigasaun hanesan sidadaun atu hato’o ami-nia hanoin no suporta mudansa iha rai-laran hodi hakarak atu enkoraja lider foun ida iha eleisaun tinan oin mai.

Nune’e, Hafoin tinan rua-nulu-resin-ida ukun aan, ita presija husu, sé lós mak hetan benefisiu husi dezenvolvimentu iha rai laran? Ami foin-sa’e barak tantu iha rai liur ka rai laran mak ladún kontente no lakon ánimu ho situasaun polítika atuál iha Timor-Leste.

“Ami sente katak polítika ohin loron ladún hakuak juventude sira-nia interese, no ami-nia maluk foin-sa’e barak iha ita-nia rai mak kontinua la hetan asesu ba oportunidade oin-oin. Maske ami foin-sa’e konstitui maioria populasaun iha Timor-Leste, ami kontinua sente eskluidu husi programa dezenvolvimentu, no ignoradu iha negosiasaun sira konabá futuru nasaun nian, no laiha reprezentasaun polítika ne’ebé bele rona foin-sa’e sira nia lian no preokupasaun,” Katak sira.

Grupu Relata, Ohin loron, ami-nia jerasaun hasoru dezafiu bo’ot ne’ebé joven iha mundu tomak enfrenta iha nível global: la iha kampu de traballu, no hasoru dezigualdade no krize ekonómika, violénsia iha forma oin-oin, liliu violénsia hasoru feto no labarik, ameasa husi mudansa klimátika, kualidade ba edukasaun no saúde ne’ebé fraku; e agora dadaun problema hirak ne’e sai piór liután ho pandemia COVID-19. Dezafiu hirak ne’e la sees husi obstákulu ne’ebé foin-sa’e sira iha Timor-Leste mós enfrenta. Ida ne’e loke ami-nia matan katak benefisiu husi dezenvolvimentu rai laran seidauk halo mudansa signifikativu ba juventude sira-nia moris. Ho problema kompleksu sira ne’e ezije líder ida ne’ebé, aléin de iha esperiénsia servisu iha nível global, entende diak importánsia husi papél Estado nian atu responde ba kestaun urjente ne’ebé jerasaun foun sira enfrenta dadauk.

Gurupu Estudante dehan, Durante nia knaar hanesan embaixadora iha ONU, Sra. Milena Pires kontribui atu hetan rekoñesimentu boot liu ba nesesidade sira ne’ebe nasaun kiik sira hanesan Timor-Leste hasoru, ho mos importânsia kooperasaun multilateral atu atinje dezenvolvimentu sustentavel no hari’i sosiedade ida ne’ebé forte, egalitáriu, justu, no inklusivu.

“Ami fiar katak bainhira sai Xefe Estadu, Sra. Milena Pires sei iha komitmentu atu sentraliza joven sira-nia interese iha politika dezenvolvimentu nasionál, reforsa no promove lei ne’ebé proteje feto no labarik sira, no promove nesesidade atu haforsa setór edukasaun, saúde no dezenvolvimentu rai laran,” Katak KI.

Nu’udar diplomata ida ne’ebé servisu ona iha forum alto-nivel hanesan ONU, ami fiar katak Sra. Milena Pires iha abilidade kle’an atu bele defende no promove Timor-Leste nia interese iha nível internasional no mos serbisu ho orgaun soberanu iha Timor-Leste ho maneira efetivu, imparsiál, no nu’udar ema independente sei laiha presaun husi interese partidu atu atinje ita-nia objetivu komún.

BT Nota iha KI katak, Ita presiza líder foun ne’ebé bele lori esperansa ba foin-sa’e sira no ba ema hotu la haree ba nia afiliasaun polítika ka husi ne’ebé. Ita presiza lider foun ne’ebé bele halo advokasia maka’as kona-ba fó protesaun ba feto no labarik, ema ho defisiénsia sira, komunidade LGBTQ no grupu vulnerável sira seluk atu sira bele sente livre no seguru iha sira-nia moris loroloron liu-liu iha espasu públiku. Ita hotu presiza lideransa foun ida ne’ebé bele luta ba direitu umanu hodi kria sosiedade ida ne’ebé justu, inkluzivu no livre husi disrikiminasaun.

Ne’e Dunik, Sra. Milena Pires hanesan líder matenek, simplis, karismátika, vizionária, e forte. Ita-nia nasaun Timor-Leste presiza iha Xefe Estadu ida ne’ebé realista, transparente, no bele hakuak ema hotu la hare’e ba kór partidu no interese pesoál. Sra. Milena Pires nia lideransa la’os deit lori mudansa signifikativu mai iha ita nia sosiedade, maibé mós sei sai inspirasaun bo’ot ba ami foin-sa’e no labarik sira, liuliu labarik feto sira, katak mudansa ne’e posível duni no mudansa ne’e bele hahú agora.

“Ho razaun sira nee, ami juventude Timoroan iha estranjeiru hakarak enkoraja no oferese ami-nia suporta ba Sra. Milena Pires atu kandidata-aan ba Presidente da República RDTL período 2022-2027,” Hateten KI.

Grupu Estudante iha Estranjeiru Suporta husi, Grupu Juventude iha Kamboja, Malazia, Tailandia, no Vietnam, relasiona ho Deklarasaun ida ne’e orijinalmente hakerek husi Grupo Juventude Timoroan iha Estados Unidos da America, no suporta hosi Kamboja, Malazia, Tailandia, noVietnam ne’ebe sente alarme ho situsaun polítika iha Timor-Leste ne’ebe kontinua nakonu ho impasse partidu polítiku no desligadu ho dezafiu ne’ebe povu sira enfrenta iha sira nia moris lor-loron, liliu juventude sira.

Em vez de lakon esperansa, ami hakarak uza ami-nia deskontentamentu ida ne’e atu mobiliza maluk foin-sa’e estudante sira seluk iha nasaun estranjeiru, ne’ebe mak iha interese no sentimentu hanesan ho ami, atu halibur hamutuk iha movimentu ida ne’e ho objetivu atu eleitu Xefe Estadu ne’ebe iha komitmentu atu lori esperansa foun ba Timoroan hotu.

Hakerek nain ba Deklarasaun ida ne’e buka atu reforma no re-imajina polítika iha Timor-Leste ne’ebe bele sentraliza juventude sira-nia interesse iha dezenvolvimentu nasionál, hanesan garantia ba kampu de traballu, asesu ba edukasaun no saúde ne’ebe kualidade, haforsa lei ne’ebe promove no proteje direitu ba feto maluk sira, no promove sosiedade ida ne’ebe inkluzivu.

Iha eleisaun ba Xefe Estadu ne’ebe sei realiza iha tinan 2022, ami hakarak oferese apoiu ba kandidatu ida ne’ebe la afilia ho partidu polítiku ruma, laiha interese pessoal, no bele promove ajenda ba dezenvolvimentu holístiku ida ne’ebe bele hakuak ema hotu la haree ba kórpartidu ka mai husi ne’ebe. Tan ne’e, ami identifika ona eis-embaixadora Timor-Leste ba ONU, Sra. Milena Pires, atu kandidata-aan hodi sai feto Timoroan ba dahuluk atu assumi kargu hanesan Presidente da República RDTL.

Apelo ba estudante no juventude Timor-Leste iha estranjeiru, Hakerek nain sira ba Deklarasaun ida ne’e konvida foin-sa’e estudante Timoroan ne’ebe namkari iha nasaun estranjeiru atu halibur hamutuk ho ami atu enkoraja no fó apoiu máximu ba eis-embaixadora Timor-Leste iha ONU, Sra. Milena Pires, atu kandidata-aan ba Presidente da República RDTL ba períodu 2022-2027. (BT)