DÍLI----Fila Limana Na’in, Inan Faluk, Lourdes Maia, Loron-loron túr fa’an etu iha Timor Plaza nia oin atu sustenta nesesidade uma laran no selu oan na’in-5 sira-nia eskola tanba nu’udar inan ida iha resposabilidade tomak ba familia.

Lurdes, nu’udar inan faluk ida sente preokupa ho oan sira nia futuru, hanoin oinsa mak bele sustenta oan sira, liu-liu sira nia estudu. Lourdes ho hanoin ida, iha inisiativa, sosa foos no modo, te’in hodi fa’an iha Timor Plaza nia oin hodi buka osan sustenta familia liliu oan sira nia eskola tanba sira mak osan mean futuru nasaun nian.

“Mai fa’an etu iha fatin ne’e, tanba osan la iha atu selu oan sira nia eskola no oinsa mak bele buka moris, tanba ne’e iha inisiativa fa’an etu iha Timor plaza nia oin, buka osan hodi selu oan sira nia eskola, no bele ajuda ami-nia nesesidade loron-loron nian,” Hateten fila liman na’in, Lourdes Maia, ba Jornalista Business Timor iha Timor Plaza, Kinta (09/09)

Nia hatutan, Fa’an etu iha fatin ne’e kleur ona, antes konfinamentu obrigatoriu mai fa’an no durante aplika konfinamentu obriogastoriu mos kontinua fa’an hodi buka moris, tanba nudar inan faluk ida ne’ebé tenke esforsu buka osan hodi sustenta oan sira nia estudu. “Ha’u nia la’en mate tiha ona, husik hela ha’u ho oan ki’ak na’in lima, oan na’in lima ne’e eskola hotu, na’in tolu iha nivél Universidade, ida iha Ensinu Sekundária no ida iha Ensino Báziku, nu’udar inan sente preokupa, oinsa mak bele buka osan atu sustenta oan sira nia estudu,” Dehan nia.

Nia relata, Hanesan Inan sempre preokupa ho oan sira nia futuru, nu’udar inan ida iha responsabilidade tomak hodi kontinua buka osan, mezmu loron-loron hetan rendimentu ne’ebé ki’ik, hanesan loron ida bele hetan dolar rua-nulu ($20) no dala ruma la to’o dolar $20, depende ba ema ne’ebé mai sosa.

Entretantu, Fila Liman na’in, Silvanha Cabral, Hatutan, Fa’an etu iha fatin ne’e, buka osan hodi selu kos, atende nesesidade família nian no ajuda alin sira nia estudu. Fa’an iha ne’e kleur ona, dala ruma ema sosa hotu no dala ruma la hotu tanba depende ba ema sira ne’ebé mai sosa etu.

“Ami fa’an, loron ida bele hetan dolar ruanulu $20 no dala ruma loron ida bele hetan to’o $30, rendimentu ne’ebé ami hetan kada loron dala ruma la to’o gastus ne’ebé iha. Mezmu hetan osan uitoan maibé kontinua nafatin fa’an tanba iha uma de’it ita la hetan osan, husi osan ne’ebé ami hetan depois hasai fali ba sosa foos, modo no buat seluk ne’ebé presiza atu te’in, nune’e bele ba fa’an fila fali,” esplika nia.

Nia haktuir, Durante fa’an etu iha Timor Plaza nia oin sempre kontenti mezmu iha difikuldades barak, dala ruma faan duni malu deit hanesan foin dadaun Konfinamentu Obrigatoriu Jeral bandu labele faan maibe ami nafatin fa’an to’o agora tama fali ho situasaun normal hanesan ne’e.

“Ha’u sente kontente tanba fa’an etu ne’e hanesan serbisu ida, mezmu hetan rendimentu ne’ebé ki’ik maibé haksolok nafatin hodi kontinua fa’an etu iha fatin ne’e atu buka moris hodi sustenta nesesidade loron-loron nian, durante tempu konfinamentu obrigatoriu mos kontinua fa’an iha ne’e,” Salienta nia. (BT)