DÍLI----Bankada Kmanek Haburas Unidade Nasionál Timor Oan (KHUNTO) konsidera Ministeriu Edukasaun Joventude no Desportu (MEJD) suspende aulas prejensiál ne’e fó impakto boot liu tanba aulas online falla totál, nune’e presiza tau atensaun no bele halo aproximasaun ba eskola privadu sira hamenus pagamentu propinas no prepara kondisaun atu reativa fila fali aula prezensiál.

Vise-Xefe Bankada KHUNTO-Deputadu, Antonio Verdiál hatete, Wainhira Deputados sira tun ba halo fiskalizasaun iha terrenu Deputadus sira so haré no rona desvantajen husi Aulas Online ne’e fó impaktu boot.

“Familia barak mak la iha kondisaun hodi sosa, Telefone Android, Familia barak mak la iha televijaun hodi akompana aulas, lnan aman barak mak la iha tempu hodi akompaiña sira nia oan iha aulas online tamba sira presija ba servisu hodi bele sustenta familia nia oan han loron-loron,” Hateten Xefe Bankada KHUNTO no Presidente Komisaun G Antonio Verdiál ba Jornalista sira iha resintus PN, Tersa (07/09)

Nia dehan, Bankada KHUNTO observa lha éreas remotas la iha eletrisidade, Professores barak mak la hetan informasaun kona-ba aulas Online, Professores barak mak la preparado hodi asesu ba aulas online.

“Ensinu aprendizajem ne’e importante tebes, tamba nasaun ne’e iha ita-nia oan sira nia liman. MEJD desde inisiu kuandu Pandemia Covid-19 afeta iha ita-nia rai Timor-Leste, Ministeriu Edukasaun no Ministeriu Ensinu Superior Suspende aulas presensial hodi opta ba aulas Ensinu Distansia ka Eskola ba uma. Wainhira suspensaun ba aulas sira, komisaun G, ne’ebé trata ba asunto Edukasaun Juventude, Kultura no Sidadania, tun ba terreno hodi hala’o fiskalizasaun ba iha Eskolas sira atu hare no rona diretamente vantajem no desvantajem husi Aulas Distansia ka Eskola ba uma sai preokupadu,” Esplika nia.

Nia hatutan, Bankada KHUNTO fó Sujestaun ba Ministeriu Edukasaun halo aproximasaun ba eskola privadu sira hamenus pagamentu propinas no prepara kondisaun atu reativa fila fali aula prejensiál.

“Husu atu Ministeriu Edukasaun halo aproximasaun ba eskola privadu sira, buka meios ou halo akordu hodi hamenus iha pagamentu propinas ka selu eskola, husu aulas presensial atu loke fila fali maibé Ministeriu Edukasaun tenki kria kondisaun hanesan, tau espasu ne’ebé luan entre mesas no kadeira sira, tau sinalizasaun iha eskolas atu alunus sira mateim distansiamentu, diminui numeru alunos sira nian, fahe alunus porturma,” Katak Antonii Verdiál. (BT)