DÍLI----Negosiante Domingas Soares, Informa, Loron-Loron tur fa’an modo iha dalan ninin atu oinsa buka osa hodi sustenta nesesidade Família uma laran nian no selu oan nia eskola tanba laen mos la servisu entaun tenke obriga fila liman hodi buka hatan necesidade lor-loron nian.

“Ha’u fa’an de’it iha ne’e, estrada ninin ne’e se la hotu mak ha’u halo ai-leva lori la’o, atu bele ema sosa netik oituan-oituan para sustenta ami-nia família uma laran no selu oan nia eskola, no haree ba nesesidade lor-loron nian,” Hatete Negosiante Domingas Soares ba Jornalista BT iha estrada ibun Beto, Segunda (09/08).

Nia hatutan, Loron ida mak ami la fa’an ne’e ami hanoin barak, tanba ita atu han hemu ne’e husu ba se, entaun ita la fa’an tiha loron ida sente lakon bo’ot no triste. “Ha’u nia servisu mak lor-loron hala’o vida moris nu’udar negosiante fa’an modo, kanku no modo oin-oin iha estrada ibun ne’e, tanba ha’u ba fa’an iha merekadu mós hanesan ema ida registu meza oan ida, entaun ema nakonu ona oinsa ho ami sira ne’e, ami ba mós hanesan de’it ema nakonu ona fatin ema nia ita labele ba hadaun,” Esplika nia.

Nia afirma, Modo sira ne’e mak ha’u fa’an iha ne’e mak la hotu, ha’u halo ai-leva lori la’o fila fali para bele hotu, ba hola fila fali iha Taibesi mai fa’an kontinua hanesan bai-bain, se la’e ba hola iha Tasi-tolu. “Ha’u hola dala ida modo oioin tomate, Modo tahan, kanku, Lis, Ai-manas, Bayam, Brinzela, Repoliu, inklui Hudi, Bua ho Malus no seluk tan, maibé hola oitua-oituan mak tau hamutuk hodi fa’an, nune’e, ba modo ka sasan sira ne’ebé mak ha’u temi ona ne’e, ha’u kuaze loron tolu ka ha’at mak foin bele hotu, entau ba hola fila fali ona, ha’u halo nusa para modo tahan sira ne’e la bele dodok, entaun tenki hamos ho didi’ak para labele dodok no estraga,” Relata nia.

Nia relata, Loron ida hetan redimentu oituan ga bo’ot ne’e grasa maromak nian, tanba fa’an ema sosa mak hesan ne’e ona, ha’u la bele obriga ema atu sosa, tanba tuir ema nia hakarak mak bele sosa, loron ida ha’u bele hetan $20 doral, $30 dolar hanesan ne’e, sorte mak sa’e ba $30 dolar ne’e, la barak hetan hanesan ne’e deit, para bele resolve nesesidade, ita la bele buka riku, riku ne’e mundu nia nesesidade la loron ida tenki iha tetik para bele tahan ita-nia kabun ne’e de’it. “Ba orsamentu sira ne’ebé mak iha no funan ne’ebé mak iha ha’u tenki rai balun, selu ha’u nia oan nia eskola, hola roupa ba ami sira hotu, hola hahan no ba ami nia nesesidade uma laran nia, ba ami nia presiza loron-loron,” Informa nia. (BT)