DÍLI----Ministru Prezidensia Komsellu Ministru (MPKM) Fidelis Manuel Leite Magalhães, Hatete, Bazeia ba Reuniaun Konsellu Ministrus delibera hodi aprova projetu Rezolusaun Governu ne’ebé impoin serka sanitária iha área sira ne’ebé abranje iha Postu Administrativu rua iha Região Administrativa Espesial Oe-Cusse Ambenu (RAEOA) atu oinsa bele fo seguransa públika, saúde públika, asisténsia umanitária, manutensaun ba sistema abastesimentu públiku nian.

“Konsellu Ministrus delibera hodi aprova projetu Rezolusaun Governu ne’ebé impoin serka sanitária iha área sira ne’ebé abranje husi Suku Naimeco, iha Postu Administrativu Pante Makasar no husi Suku Bobometo, iha Postu Administrativu Oesilo,” Hateten Ministru Prezidensia Konsellu Ministru (MPKM) Fidelis Manuel Leite Magalhães ba Jornalista sira iha Salauan PKM, Palasio Governu, Kuarta (04/08)

Nia hatutan, Postu administrativu rua ne’e iha Rejiaun Administrativa Espesiál Oekuse Ambenu, hahú oras 00:00 loron 5 fulan-Agostu tinan 2021 to’o oras 23:59 loron 18 fulan-Agostu tinan 2021.

Nune’e, bandu sirkulasaun ema sira-nian entre Suku sira ne’ebé temi no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian.

Nia dehan, Serka Sanitaria ne’e la inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, nomós labarik sira ho idade tinan-6 mai kraik ne’ebé akompaña indivíduu sira ne’e.

Ho Serka Sanitaria ne’e, Xefe Sentro Saúde Postu Oesilo, Domingos Neno, Hatutan, Iha suku rua refere detekta ona kasu foun numeru sa’e makaas tanba ne’e presiza Serka Sanitaria hodi oinsa bele fo seguransa públika, saúde públika ba interese públiku nian.

“Horseik hetan detensaun numeru pozitivu ida naran Jemiliati Fallo original husi (kefa) kaben ho mane husi bairo Saben suku Bobometo, maizumenus tuku 4 ho balun iha sentru saude Oesilo. Mediku iha sentru halo kedas prosesu ezaminasaun depois halo transporta kedas ba sentru izolamentu RAEOA,” Hatete, Xefe Sentro Saúde Postu Oe-silo Domingos Neno ba Jornalista BT liu husi Via telefone, iha nia kna’ar fatin Sentru Saúde Oesilo.

Depois de transporta xefe sentru saude Oesilo konvoka enkontru urjente atu foti desizaun konaba prevensaun komunidade sira tanba geografikamente iha fronteira entre Oesilo ho Napan, Nusa Tengara Timur (NTT) Indonezia.

Enkuantu, Partisipa iha enkontro ne’e mak husi ekipa Sentru Saúde Oesilo, ekipa husi sekretário Estadu Asuntu Saúde, Seguransa Polisia (UPF), Eskudra Polisia Oesilo, inklui Lider Komunitaria sira Aldeia Saben ho Usapi-Kolen, rezultadu husi enkontu mak ohin loron halo teste swab PCR halo vasinasaun ba area ne’ebé afeta pozitivu, sei hare’e atu aplika serka sanitaria no konfinamnetu obrigatóriu.

“Komesa ohin no aban sei hare’e progresu area afetadu Saben progresu kona-ba transmisaun oinsa? Aban mak iha tan pozitivu entau tenke aplika konfinamnentu obrigatoriu,” Informa nia (BT)