DÍLI----Prezidente Autoridade, Região Administrativa Espesial Oe-cusse Ambeno (RAEOA), Arsenio Paixão Bano, Hatete, Governu sentral liu husi Ministéreiu Transporte no Telekomunikasaun (MTK) mak tenke responsabél ba Ró foun atu substitui Ró TranShip II.

“Kona-ba Ró ahi foun atu mai substitui Ró TranShip II ne’e kompetensia husi governu sentral mak bele foti desizaun, liuliu Ministru Transporte no Telekomunikasaun, no fiar katak Ró foun sei mai iha tempu badak hodi subtitui Ró ahi TranShip II,” Hateten Prezidente Autoridade Região Administrativa Espesial Oe-cusse Ambeno (RAEOA), Arsenio Paixão Bano ba jornalista BT iha nia kna’ar fatin Farol, Tersa (03/08).

Nia hatutan, Ba aviaun dadaun hala’o hela operasaun, semana ida dala rua iha loron tersa no sexta hodi tula pasajeiru sira Dili ba Oe-cusse no Oe-cusse mai Dili. Aviaun labele halo operasaun loron-loron tanba fo lisensa husi sentru integradu no jestaun krize husi Governu sentral, nune’e bele halo prevensaun ba pandemia Covid-19. “Espera movimentasaun ba transporte maritima sei rezolve iha tempu badak husi governu sentral,” Tenik Bano.

Nia akresenta, Ba Oe-cusse oan sira ne’ebé mak kompleta ona vasina doze-daruak bele la’o livre la presiza tama kuarenta iha Oe-cusse maibé sira ne’ebé mak foin simu vasina dala ida no sira ne’ebé mak seidauk simu vasina tenke kumpri kuarentena lorn-14 bainhira viajen ba Oe-cusse.

Entretantu, Agustinho Ola nu’udar Pasajeiru Oe-Cusse oan sente triste tanba daudaun ne’e movimentasaun trasnporte maritima laiha hodi hala’o sira nia viajen hanesan bai-bain tanba Operasaun Ró paradu, difikulta komunidade Oe-Cusse no Atauru liu-liu negosiantes sira halo movimentu.

Agustinho husu Guverno sentral liu-liu Ministeriu Transporte no Telekomunikasaun atu buka alternativu ida, nune’e substitui Ró TranShip II ne’ebe suspende husi governu rasik hodi normalize movimentasaun Dili, Oe-cusse no Oe-cusse, Dili. “Dadaun Ró samudra Bintang 8 hala’o operasaun Dili Oe-Cusse tula sanan nesesidade basika maibe la autoriza atu tula pasajeiru tanba aluga husi kompaña balun,” Hateten Agustinho.

Nia dehan tan, Ohin iha gabineti Zona Espesial Ekonomia Sosial no Merkadu (ZEESM) alista ona naran kuaze ema na'in-50 ona iha gabineti, sira ne’ebé vasina dala rua prepara viagen no sira ne’ebé vasina dala ida no seidauk vasina presiza halo karta guia de marsa no swab test”.

Naran ne’ebé alista ona sei hein kontaktu husi gabineti tanba sei iha faze negosiasaun ho konpania ne’ebé mak atu aluga Ró Bintang Samudra 8 iha loron 04 fulan Agostu. Pasajeiru ejizi atu viajen tanba iha asuntu kultura ka lia mate ne’ebé presiza duni tenke ba no na'in-15 lima mak vasina ona dala rua, hein deit informasaun husi gabineti ZEESM Farol Dili, hakotu Agustinho. (BT)