DÍLI----Ministru Ensinu Supérior Siensia no Kultura (MESSK) Longuinhos dos Santos, Informa, ligadu ho variante ne’ebé ameasa bo’ot ba Estudante sira liur, MESSK seidauk iha Planu atu Apoia Insentiva Estudante ne’ebé eskola iha liur, tanba agora dadaun ne’e sei fasilita ensinu Superior Privadu no Públiku iha rai laran hodi fahe Material Prevensaun ba Covid-19 hodi Reativas fali Aulas Prezensial.

“Ligadu ho Variante Foun ne’ebé Ameasa bo’ot ba estudante sira iha rai liur, atu apoia insentiva ruma ba estudante iha rai liur, normalmente ita seidauk iha Planu, liuliu ba Ministériu Ensinu Superior Siensia no Kultura nian, dadaun ne’e ita sei fasilita hela ensinu Superior Privadu no Públiku iha rai laran, foin dadauk mak realiza Konsellu Reitorer ita fasilita ekipamentu prevensaun Covid-19 nian mak hanesan Maskra, Hand Sanitaizer no mós Termu Eskiner ba ensinu superior sira molok reativa aulas prezensial,” Dehan MESSK Longuinhos dos Santos ba jornalista sira iha Timor Lodge Komoro, Sabadu (31/07).

Nia hatutan, Atu fasilita Estudante sira iha rai liur hetan vasina, simu ne’e responsabilidade Governu nian, maibé atraves ke ida ne’e liu husi Ministériu Negosiu Estranjeiru mak sei responsabiliza haree kestaun ida ne’e no liu husi Ministériu Saúde ne’ebé haree kestaun atu Vasina. “Ba ita nia alin Estudante sira ne’ebé iha rai liur liu liu atu hetan vasinasaun, tanba ne’e iha ona koordenasaun, atu realiza ida ne’e presiza informasaun ne’ebé mai husi ita nia embaxadór sira, depois iha adidu saúde mós iha neebá,” tenik nia.

Nia dehan, Kria mós adidu saúde nian informasaun presiza informa mai iha embaxadór, hafoin embaxadór bele informa mai Ministra MNEK atu bele trata asuntu ida ne’e liu husi liñas Ministériais ne’ebé iha hanesan liu liu Ministériu Saúde atu bele trata ida ne’e.

Iha sorin seluk, Vise Ministru Negosiu Estranjeiru no Kooperasaun (MNEK) Julião da Silva, hatutan, Meius ida atu apoiu insentiva ne’e Ministériu Esinu Superior Siensia no Kultura nia papel, MNEK fasilita komunikasaun de’it halo ligasaun, kona-ba oinsa atu apoia, kona-ba osan ruma ne’e ministériu relevan sira mak bele hatene ida ne’e.

“Kona ba Estudsnte Timor oan sira nia pasaporte kaduka ona, ne’e Ministériu Justisa no Ministériu Negosiu Estranjeiru sei halo hela despaisu intergradu entre ministériu rua ne’e atu nune’e ita nia konsuladu sira ka ita nia embaxada sira bele ajuda fasilita fó karimbu provizopriu, bainhira nor,aliza ona sira bele mai estende sira nia pasaporte,” dehan nia, hafoin partisipa reuniaun estraordinariu Konsellu Ministu iha Palasiu Governu, Sesta (30/07).

Nia dehan, Kona-ba estudante sira nia pasaporte kaduka, dadaun ne’e konsoladu sira servisu maka’as hela oinsa bele fasilita mós estudante sira atu vasina. “Ha’u nia hanoin ita nia fronteira ne’e loke hela tuir orariu ne’ebé antes ne’e iha ona, se estudante sira mai, ita nia sidadaun ne’e prioridade liu sira bele fila mai, ita nia konsolada sira mós servisu hamutuk hela ho KBRI hodi haree baa suntu ne’e, oinsa bele fasilita sira vasina,” tenik nia. (BT)