DÍLI----Ministru Prezidensia Konsellu Ministru (MPKM) Fidelis Leite Magalhães, Hatete, Governu da ualu, liu husi reuniaun Konsellu Ministru deside kontinua extende Serka Sanitária ba loron 14 iha Muni sípiu Díli ho razaun Dili laiha mudansa ba moras hada’et Covid-19.

“Konsellu Ministrus aprova ona, hafoin halo análize ba aprezentasaun kona-bá pontu situasaun epidemiolójika nasionál nian husi Sala Situasaun Sentru Integradu Jestaun Krize (SIJK) Konsellu Ministrus delibera atu aprova projetu Rezolusaun Governu nian, ne’ebé mantein impozisaun serka sanitária iha munisípiu Dili ba loron 14 tan, to’o oras 23:59 loron 29 fulan-Jullu tinan 2021,” Hateten Ministru Prezidenti Konsellu Ministru (MPKM) Fidelis Leite Magalhães hafoin remata enkontru KM ba Jornalista sira iha Palásiu Governu, Kuarta (14/07).

Governante hatutan, Governu bandu nafátin sirkulasaun ema sira iha Munisípiu Díli no sirkunskrisaun administrativa sira-seluk, exetu iha kazu hirak ne’ebé ninia fundamentu forte, tanbá razaun sira seguransa públika, saúde públika, asisténsia umanitária, manutensaun ba sistema abastesimentu públiku, ho razaun seluk ne’ebé presiza atu hala’o ba interese públiku nian.

Nia dehan, Proibisaun sirkulasaun ne’e la abranje ba ema sira ne’ebé komprova ona vasinasaun kompleta (doze rua) kontra COVID-19 nian, nune’e mós ba labarik sira iha tinan neen mai-kraik ne’ebé akompañia inan-aman sira, delibera mós katak, oras ne’e sentru sira kontrolu integradu nian, atu tama no saí husi Munisípiu Dili, seí funsiona durante oras 24 loron-loron.

Alende ne’e mós Konsellu Ministru (KM) aprova projetu Dekretu-Lei, ne’ebé aprezenta husi Ministru Turizmu Komérsiu no Indústria (MTKI) José Lucas do Carmo da Silva, ne’ebé ba alterasaun dahuluk ba Dekretu-Lei nu. 10/2018, loron 9 fulan Abríl,ne’ebé aprova Estatutu husi Institutu ba Kualidade Timor-Leste, I.P. (IQTL). “Proposta ida ne’e altera kompozisaun órgaun no rekizitu sira vinkulasaun IQTL nian, haluan númeru membru sira no konkretiza kompeténsia sira ne’ebé atribui ona ba kada órgaun IQTL,” Informa nia. (BT)