DÍLI----Diretor ezekutivu Forum Organizasaun Naun Governamental Timor-Leste (FONGTIL) Daniel Santos do Carmo, Informa, Sosiedade Sivil apresia Orsamentu Jeral Estadu (OJE) tinan 2022 ne’ebe mak governu defini ona ba programa prioridade-6, Sosiedade Sivil fiar katak ho definisaun programa prioridades nasional ba tinan fiskal 2022, sei tulun atu hadiak diak liutan necesidade povu nian duni tanba fundamentu kapasidade iha análise kontestual no análise situasaun Timor-Leste nian ne’ebe bele identifika seitores prioritarius ne’ebe aserta duni ba necessidades no desafiu povu no ba sustentabilidade Timor-Leste.

“Sosiedade sivil apresia tebes ba sinsieridade governu nian ne’ebe mai duni ho fundamentu kapasidade iha análise konteistual no análise situasaun Timor-Leste nian ne’ebe bele identifika seitores prioritarius ne’ebe aserta duni ba necessidades no desafiu povu no ba sustentabilidade Timor-Leste nudar estadu,” Hateten diretor ezekutivu Daniel Santos Do Carmo, liu husi konferensia Imprensa ba jonalista sira iha salaun FONGTIL-DíLi, Kinta (08/07).

Nia hatutan, Sosiedade Sivil a nota iha Jornada orsamental ba Orsamentu Jeral Estadu 2022 nian ho tetu orsamentu fiskal US$1.5 Bilhões defini ona Programa prioritários 6 mak hanesan; Kapital Sosial (Edukasaun, formasaun profissional no Saude), Abitasaun no Inklusaun Sosial, Seitor Produtivus (Agrikultura, Turismu, Ambiente no konektividade), Desenvolvimentu Seitor privadu, Dezenvolvimento rural no Governasaun.

Nia dehan, Husi Programa hirak ne’e, governu Timor-Leste tama hikas fali ba preparasaun planu no Desafiu komun sira ne’ebe mós nafatin hetan atensaun máxima husi diskusaun mak hanesan situasaun covid-19 iha Timor-Leste no Inundadasaun no rai monu, entaun ho orsamentu hodi kontinua misaun ba libertasaun povu husi kiak no mukit.

Nune’e, Governu Daualu hahù diskusaun iha jornada orsamental ba Orsamentu Jeral Estadu 2020 iha loron 29 Juñu 2021 ho tema Kualidade orsamentu kresimentu inklusivu no sustentável. Natureza husi debate iha jornada orsamental mak atu defini prioridade nasional ba tinan fiskal.

“Sosiedade sivil fiar katak ho definisaun programa prioridades nasional ba tinan fiskal 2022, sei tulun atu hadiak ita-nia edukasaun iha nia asesu no nia kualidade. Ita inferenta ona no infrenta dau-daun desafiu wain iha prosesu desenvolvimentu edukasaun iha aspeitu infraestrutura eskola, kurrikúlu, kualidade no kuantidade professores, materiais aprendizajem no facilidades apoiu sira seluk. sai defisil liu tan bainhira ho existensia surtu Covid-19 iha tinan rua ikus, ne’ebe destroi kalendáriu akademika, obriga atu tenke halo suspensaun ba aula prezensial até ezame sira. Halo Timoroan sira labele hetan oportunidade diak liu atu desenvolve sira nia koñesementu no abilidade,” Relata nia.

Nia dehan, Ho definisaun seitor saúde nudar programa prioridade iha orsamentu Jeral Estadu 2022, sei tulun Timoroan sira atu asesu ba prestasaun servisu ne’ebé diak no besik iha sira nia hela fatin, hetan konsulta tratamento regular husi médiku matenek no partera profissional liu-liu ba labarik no inan isin rua sira iha sentru saúde ne’ebe kualidade, hado’ok Timoroan sira husi moras kontagiosa oi-oin inklui surtu Covid-19.

Nia relata, Iha apeitu be’e mós saneamentu, sei tulun família sira hotu asesu ba be’e mós ne’ebe seguru no sustentável liu husi hadia infraestrutura bee-mós no saneamentu hodi garante distribuisaun bee-mós ba ema hotu tanba hare Ita-nia produsaun agríkula sei aumenta liu tan hodi haforsa ita nia rezilensia no soberania ai-han, família agrikultores sira sei kontinua halo produsaun no sei hetan rendimentu bo’ot hodi bele hadia ekonomia família nian. Iha tempu hanesan mós buka atu kore a’an husi dependênsia ba seitor minarai no gas liu desenvolviemntu iha agrikultura no turizmu.

“Sosiedade sivil louva vontade guvernu nian hodi bele tau prioridade ba asunto nebe liga ho povu nia moris. Sosiedade sivil apresia guvernu tanba tau prioridade ba setor produtivu nudar dalan ida kore-an husi dependência ba fundu petrolífero no hahú da-daun diversifikasaun ba fundu petroliferu,” Akresenta Diniel ho oin kontenti.

Nia salienta, Sosiedade sivil deklara apoiu tomak ba inisitiva governu nian hodi hadia povu nia moris liu husi orsamentu estadu 2022 no sei mobiliza mós apoiu husi komunidade Timor-Leste no komunidade internasional ba polítika brilante governu Timor-Leste ida ne’e. “Sosiedade sivil mós sei halo sosializasaun maka’as liu tan no halo konsiensializasaun ba komunidade atu bele simu vassina hodi kria kondisões ba governu ita bele servisu diak liu tan iha implementasaun programa prioritarius sira, no Ami husu konfiansa tomak ba governu hodi hein atu servisu hamutuk,” Informa Daniel (BT)