DÍLI----Ministru Interiór (MI) no Atuál Primeiru Ministru (PM) Taur Matan Ruak Kondena aktu membru Polísia Nasionál Timor-Leste (PNTL) ne'ebé tiru mate sidadaun na'in rua no ida kanek todan, iha Lahane Postu Administrativu Na'in Feto Munisípiu Díli.

“Primeiru Ministru hanesan mós Ministru Interior, Taur Matan Ruak, lamenta tebes no kondena hahalok elementu Polisia Nasional Timor-Leste (PNTL) ne’ebé mak tiru mate sidadaun na’in rua no ida kanek todan iha Lahane Osidental," Dehan PM Taur, Iha nia Komunidu Imprensa ne'ebé mak Jornalista Bisnis Timor asesu iha WhatsApp Grupu Media PM, Sabadu (05/06).

Tanbá ne'e Primeiru Ministru no atuál Ministru Interior, hato’o profundas sentidas kondolénsias ba familia vítima hosi akontesimentu ne’e. “Ha’u hakfodak no triste rona elementu PNTL ida ohin madrugada hodi arma Estadu nian tiru mate ita-nia sidadaun na’in rua, no ida kanek todan, iha Lahane Osidental," Dehan PM Taur

Xefe Governu lamenta no kondena tebés aktu refere, ita hotu la tolera ida ne'e, no hanesan Primeiru Ministru no Ministru Interior, ha'u orienta ba Komandu PNTL para dezarma elementu ne’e, hatama ba sela hodi halo prosesu investigasaun. “Iha biban ida ne’e, hodi ha’u-nia naran rasik, no Governu tomak, hato’o mós ami-nia profundas sentidas kondolénsias ba familia matebian nian, no husu deskulpa boot ba familia vítima sira ba hahalok ne’ebé involve hosi elementu PNTL ne’e”, Primeiru-Ministru Taur Matan Ruak.

Xefe Governu mós kompremitidu, Governu seí hola medidas ne'ebé forte hasoru elementu Polisia ne’e hodi bele responsabiliza ba aktu ne'ebé nia halo ona, no Governu sei kontinua akompanha prosesu hotu nomós sei apoiu familia matebian nian hodi hetan justisa ba akontesimetu ne’e.(BT)