DÍLI----Prezidente Repúblika Francisco Guterres Lú Olo promulga ona Dekretu Parlamentu Nasionál númeru 34/V refere ba alterasaun dahuluk Lei Orsamentu Jerál Estadu ba tinan-2021 no Aprovasaun Medidas Apoiu Sosiu ekonómikus.

“Prezidente Repúblika konklui katak Dekretu Parlamentu Nasionál ne’e tuir presupostu no rekizitus ne’ebé iha konformidade ho dispozisoins aplikáveis Konstituisaun Repúblika no nia Lei sira, no mós kondisoins polítikas ba nesesidade, konveniénsia no preménsia no nune’e, promulga Lei Orsamentu Jerál Estadu ba tinan-2021,” Nota KI.

Parlamentu Nasionál aprova alterasaun dahuluk ba Orsamentu Jerál Estadu ne’ebé lori mudansa ba Orsamentu Administrasaun Sentral ho valór osan $1.932.543.312 hetan aumentu $135, 300.000, Fundu Covid-19 ho valór osan $287.641.793, hetan aumentu $256.641.793, Fundu Kontejénsia $65.151.800, hetan aumentu $41.388.428.

Nune’e, Reseitas husi orgauns no servisus Administrasaun Sentral husi alterasaun Orsamentu Jerál Estadu ba tinan-2021 sa’e ba $1.932,5 millioins, reseita petrolíferu estimada husi Fundu Petrolíferu mak $1.377,6 millioins. Maske iha aumentu husi reseitas, alterasaun ba Orsamentu Jerál Estadu mantein nafatin Rendimentu Sustentavel Estimadu ho valór $547,9 millioins.

Notasaun iha KI Esplika katak, Alterasaun lejislativas prinsipais husi Dekretu Parlamentu Nasionál iha relasaun ho Lei aprovasaun Orsamentu Jerál Estadu ba tinan-2021, iha dezembru 2020 tanba medidas apoiu estensivas hodi hamenus efeitus negativus husi Covid-19, mota no be-sa’e iha 2020 no inundasaun iha 4 abril 2021.

“Promulgasaun Lei Orsamentu Jerál Estadu no Aprovasaun Medidas Apoiu sei fó kbiit ba Governu atu fó apoiu empregu, subsídiu ba traballadór sira, emprezariu sira, traballadór servisu doméstiku nian no jerentes no administadores, kontribuisaun sosial no dispensa kontributiva, subsídiu estraordináriu ba dezempregu, subsídiu estraordináriu ba eletrisidade, subsídiu estraordináriu ba renda, subsidiu ba estudantes, moratóriu ba kréditu no seguransa alimentár,” Nota Informasaun. (BT)