DÍLI----Formador Asosiasaun Radio Komunidade Timor-Leste (ARKTL) Presario Ximenes informa ARKTL Kongratula ba loron Mundial Liberdade Imprensa espasial ba jornalista sira iha Timor-Leste atu sai matadalan ba povu kbi’it laek sira liu husi akontesimentu oioin.

“Ba Selebrasaun loron Mundial Liberdade Imprensa ha’u atu fó lia menon espesial ba kolega Jornalista sira iha Timor-Leste ita hotu hatene katak agora ne’e mídia sai hanesan Matadalan ba Povu kbi’it laek sira liuhusi akontesimentu oioin Politika, akontesimentu Dezastre Naturais ema sofre, ema barak sai vitima, tanba ne’e ita husu ba mídia bele hamri’ik independentemente liliu Jornalista sira iha konteudu publikasaun informasaun atu labele sadere ba grupu A no grupu B,” Hatete Formador ARKTL, Presario Ximenes ba jornalista BT iha salaun HAK Farol, Dili, Segunda (03/05).

Nia dehan, Jornalista sira bele hamriik nu’udar ema ne’ebé reprezenta no ema ne’ebé sei lori lia los atu bele sai matadalan di’ak hodi hatudu ba Mundu no Governu Timor-Leste katak ida ne’e mak povu nia sofrimentu. “Se bele karik hamri’ik nu’udar ema ne’ebé mak reprezenta, ema ne’ebé mak sei lori lia los atu bele sai matadalan di’ak hodi hatudu ba mundu no hatudu ba ita nia Governu katak ida ne’e mak povu nia hakarak no ida ne’e mak povu nia sofrimentu atu nune’e bele mosu politika foun ida relevante iha situasaun ida ne’e,” Informa-nia. (BT)