DÍLI----Sosiedade Sivil (SS) liuhusi diretor Luta-Hamutuk José Alves da Costa, Informa, Sosiedade Sivil husu ba parte Diresaun Transporte (DT) bele koopera ho Eletrisidade Timor-Leste (EDTL) hodi responde lalais lampu trafiku ne’ebé mak a’at iha Díli laran.

“Ha’u hanoin lampu trafiku ne’e iha para atu regula movimentu para labele ultrapasa malu tuir nia gostu maibé tenki regula ida ne’ebé mak tenki ba uluk konforme lampu ne’e mak manda, se lampu trafiku ita monta tiha mak a’at fila-fali no ita laiha atensaun para oinsa atu bele hadia lolos ne’e kestaun tekniku ki’ik-oan, lolos ne’e hakarak husu ba parte Diresaun Tranporte (DT) bele koopera ho Diresaun Eletrisidade (DE) responde lalais lampu trafiku sira ne’ebé mak a’at iha sidade Díli,” Hatete diretor Luta-Hamutuk, José Alves da Costa ba Jornalista BT iha nia kna’ar fatin, Luta-Hamutuk Farol, Díli, Segunda (03/05).

Nia hatutan, Durante ne’e ita hare'e katak Timor ne’e so gosta mak halo foun deit, maibé laiha hanoin ida no laiha planu diak ida ne’ebé mak oinsa atu bele asegura ninia sustentabilidade hanesan lampu trafiku sira talvez mean hotu no kontrariu ida sorin mean, ida sorin ne’e azul ne’ebé dala barak akontese.

Nia dehan, Agora a’at liu tan mak mate total ida ne’e sei sai hanesan ameasa ba utilizador sira ne’e, tanba ne’e espera katak iha diresaun kompetente iha tranporte ninia bele hare'e lalais ida ne’e, maibé ho ida ne’e tenki kolabora hamutuk ho diresaun eletrisidade.

“Tanba ne’e ha’u la hatene iha Ministeriu Transporte no Komunikasaun ninia ne’e sira iha diresaun ida para atu halo hanesan observasaun ba iha ekipa espesifiku ruma iha ka lae, maibé lolos ne’e ekipa espesifiku ne’e iha koopera ho ED para bainhira iha problema ruma ne’e sira tenki toma atensaun lalais, tamba lampu trafiku ne’e sei kuandu ita la kontrola didiak bele sai ameasa ba ema nia vida,” Informa nia. (BT)