DÍLI----Governu da-ualu liuhusi Ministra Saúde (MS), Odete Maria Freitas Belo, hamutuk ho Membru Governu balun hanesan Vise Ministru Saúde (VMS), Diretora Geral bá Protesaun Saúde, UNICEF, Servisu Autónomo ba Medikamentus Ekipamentus Saúde (SAMES) no Organizasaun Saúde Mundial, halo lansamentu covax Vasina Covid-19 (AstraZeneca) bá dala-rua, halo distribuisaun bá Munisípiu, Lautem, Baukau, Suai, Ainaro, Likisa no Bobonaro.

Tuir Observasaun Jornalista Business Timor (BT), iha terrenu hetan dadus bá covax Vasina Covid-19 (AstraZeneca) iha 24.000 dozes, Aileu-590, Ainaro-690, Baukau-1.730, Bobonaro-1.080, Covalima-920, Dili-3.190, Ermera 900, Lautem 740, Likisa 620, Manatutu 590, Manufahi 680, RAEOA 1.360, Vikeke 910 husi ne’e mak total 24.000 dozes, planu distribuisaun bá munisípiu hotu.

“Ikus liu ha’u la haluhan, bá ekipa Servisu Autónomo ba Medikamentus Ekipamentus Saúde (SAMES), orsida hala’o viagem bá munisípiu, hato’o hela ha’u nia respeita no komprimentus bá ita-nia akompañamentu sira, sei servisu la’o hamutuk bá munisípiu, uluk nanain ha’u hakarak dehan vasina ne’e, asaun ida ikus nian ba prevensaun covid-19, atu hakarak alerta nafatin, katak prevensaun importante ne’ebé mak ita sei mantein uza nafatin maskara asegura ita nia liman mós nafatin antes atu han, se karik ita bele minimiza no fó vantegem ne’ebé di’ak, hodi hadok ita husi moras ne’ebé mak iha, distansia sosiál importante tebes,” Hatete Ministra Saúde, Odete Maria Freitas Belo ba jornalista sira iha SAMES Kampo-Alor, Kinta (08/04).

Nune’e, SAMES sai fatin bá ita hodi rai sasán prevensaun bá Covid-19, rai ho di’ak atu ema hotu bele, asegura hodi asesu, servisu no prezensa importante tebes. “Distribuisaun covax Vasina Covid-19 (AstraZeneca), ha’u sei la ko’alia barak, tanba ita bo’ot sira iha esperensia halo ona distribuisaun bá ai-moruk malirin nian, Vasina Covid-19 la-iha diferensia ho vasina sira seluk, durante ne’e, ita mós halo hela distribuisaun, ne’ebé ita tau-iha temperatura husi 2 to’o 8 Grau Selsius, ha’u konfia ita bo’ot sira halo distribuisaun vasina Covid-19 nian bá Munisípiu,” nia subliña.

Aleinde ne’e, dala-ruma ita hatene ona, senti hanesan meius babain, ne’ebé mak ita halo hodi ita haluhan, buat ki’ik oan ruma, ita mós agora iha situasaun inundasaun hanesan rai-monu no estrada-att, responsablidade bo’ot bá kondutor no akompañamentu sira atu lori vasina covid-19 to’o iha Munisipiu ho di’ak.

“Lista vasina Covid-19 lori bá tenki hetan asinatura, no asegura nia númeru hala’o hanesan ne’e atu ita bele hatene vasina ne’e, labele lakon no la to’o, hakarak atu dehan bainhira to’o iha munsípiu mak loke haree ampolas rahun ka att, husu bá diretór sira halo karta eskrita hato’o ba Ministeriu Saúde, ida ne’ebé mak att atu nune’e hodi troka filafali, ita sura 24.000 dozes bá ema, sé ida lakon, ema na'in sanulu (10) sei la hetan vasina, loron 9 Abril sei kontinua distribuisaun bá munisípiu seluk ne’ebé mak sei-da’uk hetan,” Informa Nia. (BT)