DÍLI----Sentru Integradu Jestaun de krize (SIJK) rejista pasiente ne’ebé afetadu ba COVID-19 ho kondisaun ne’ebé mak grave iha sala izolamentu Vera-Cruz. Tuir Ofisiál Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, SIJK-SS), Dr. Rui Maria de Araújo Informa, mós ba públiku katak hahú ohin madrugada fatin izolamentu Vera-Cruz simu tan kazu detektadu ida hatudu sintomátiku grave.

“Kazu detetadu ida, sintomátiku, grave. Kazu ne’e, señora, idade 69 anos, iha istoria diabete ho obesidade. Hahu isin-manas no i’is-bo’ot semana 1 ona. Oras ne’e dadaun halo hela tratamentu ba infesaun seluk ne’ebé mós afeta ninia pulmaun, no pasiente uza hela “High Flow Oxigen,” Hatete Ofisiál Kordenadór Forsa-Tarefa ba Prevensaun no Mitigasaun Surtu Covid-19, Rui Maria de Araújo ba Jornalista sira liu husi Via video ZOOM, iha SS-SIJK, CCD, Merkadu Lama, Kuarta (31/03).

Dr. Rui Hatutan, Iha mós kazu detetadu na’in-3, sintomátiku moderadu, ne’ebé mós oras ne’e iha fatin izolamentu Vera-Cruz. Sira na’in-3 nia kondisaun estável. Nia dehan, Kazu akumulativu loron ohin iha munisipiu Díli kazu ohin hamutuk na’in-41, rekoperadu na’in-8, no ativu iha Izolamentu Tibar, Tasitolu, Vera-Cruz, Hotel Novo Horizonte hamtuk na’in-415. “Kazu foun ohin na’in-41, Kazu rekuperadu na’in-8, Total kazu ativu iha Isolamentu na’in-415, Husi total kazu foun ohin: mane na’in- 24, fetona’in- 17, Sintomátiku na’in-3, Asintomátiku na’in-38,” Nia informa.

Nune’e em nome governu ka Sentru Integradu Jestaun Krize husu ba populasaun iha Dili laran tomak, atu nafatin kalma, lalika pániku, halo tuir regra konfinamentu domisiliáriu jeral, fo’o tempu ba ekipa konjunta saúde buka tuir kontaktubesik sira hotu. Hakarak apela ba populasaun iha Covalima, atu nafatin disiplina iha medidas protesaun no ijiene pessoál, no evita hakat ba-mai iha fronteira.

Apela mós ba populasaun Timor-Leste tomak, liu-liu iha munisipiu sanulu seluk ho RAEOA atu tu’ur hakmatek iha fatin, atu nafatin matan-moris neon nain, pratíka nafatin medida sira ne’ebé ita hotu hatene ona. Nia Informa ba publiku mos katak Fo’o hanoin ba populasaun katak Rezolusaun Governu Nº12/2021, 8 de Marsu kona-ba serka sanitaria iha Munisipiu Dili, proibi ema atu tama sai husi Dili. Hotu-hotu tu’ur hakmatek iha fatin.

Autoridade ne’ebé bele autoriza ema nia movimentu maka Brigadeiro General Aluk, Diretor Centro Integrado Gestão de Crises. Resolução Governo ne’e mós obriga sidadaun hotu iha sidade Dili, atu halo konfinamentu domisiliáriu jeral. Ida ne’e signifika, hela iha uma, labele sai. Sai deit wainhira presiza tamba moras, hola hahán, ou sira ne’ebé halo servisu esensiál. Nune’e, Informa mós ba públiku katak hahú ohin, dia 13 de Marsu, hamosu ona korredor abastesimentu ba sasán atu sai husi Dili, no tama mai Dili.

Pedidu autorizasaun hotu tenki diriji ba Brigadeiru Jeneral João Miranda ‘’Aluk’’, Diretor Centro Integrado de Gestão de Crises-Sala de Situação. “Uza mascara; fase liman beibeik ho sabaun ka dezinfetante ruma; evita kose liman ba matan, inus ho ibun; wainhira kumprimenta malu, lapresiza ka’er liman, bensa-liman, rei-malu ka haku’ak malu; evita halibur malu barak; hamri’ik ka tur do’ok husi ema seluk, mínimu metru ida ho balun.” Informa nia. (BT)