DÍLI----Estudantes husi Úniversidade Nasionál Timor Lorosa'e (UNTL) hala'o Konferensia Imprensa atu husu Governu koordena ho operador sira hodi fasilita redi gratuita ba estudante sira.

Tuir Porta Voz Estudantes UNTL Zebedeo Montero Pinto hatete durante Governu implementa Serka Sanitária Konfinamentu no Obrigatoriu iha kapitál Díli, maibé estudante maiória mak la asesu estuda liu husi via online, tanbá laiha osan sosa pulsa hodi asesu estuda liu husi via online, nune’e husu Governu liu husi Sekretáriu Estadu Komunikasaun Sosiál (SEKomS) hodi oinsa koordena ho operador sira iha Timor-Leste hodi fasilita redi gratuita ba estudante sira, liu husi estuda via online.

“Husu ba Sckretario Estado Telekomunikasaun social, koordena ho operadór TT, Telemor no Telecomcel hodi apoiu liña gratuita ba estudante sira iha tempu Estadu Emerjensia (EE) no Serka Sanitária no Konfinamentu Obrigatóriu (SSKO),” Dehan Porta Voz Zebedeo Montero Pinto liu husi Konferensia Imprensa (KI) iha UNTL lama Kaikoli, Tersa (30/03).

Portanvoz relata, Governu la prepara kondisaun ba estudante sira, iha prosesu ensinu aprendijazen ho maneira via online, tanba foti desizaun laiha observasaun no diskusaun ne’ebe klean husi Governu rasik. Ho nune’e, Husu mos ba Ministerio Ensino Superior Siensia no Kultura (MESSK) atu reativa fali prosesu aprendijazen ho maneira semana semana, atu nune'e estudantc sira la bele abandona sira nia estudu.

Tuir nia, Úniversidade Nasionál Timor Loro Sa'e (UNTL) liu husi Faculdade Siensia Sosias, hakarak husu ba Governu, atu altera rezolusaun governu númeru 15/2021 ne'ebé aprova iha loron 15 fulan Marsu, kona-bá Serka Sanitária no Konfinamentu Obrigatóriu, hodi impede no limita movimentu ba mai.

“Atu remata ami husu ba lider nasionál sira tur hamutuk, hodi buka solusaun ba problema ne'ebé mak dau-daun ne'e povo no nasaun infrenta, tambá tuir ami nia haree, wainhira lider sira mak la'o ketak-ketak seí la resolve problema ne'ebé mak Povo no infrenta dezenvolvimentu seí la'o hakdasak no seí kria dezempregu iha Timor-Leste,” Informa Estudante sira. (BT)