DILI–Relasiona ho politika governu Timor Leste iha tinan mandatu ikus hodi implementa projetu $3.00 ne’ebe oras ne’e lao iha Dili laran hodi hamos foer iha kapital povu sira husu governu atu bele kontinua. Tanba husi projetu $3.00 fo ona servisu balu ba povu sira ne’ebe durante ne’e la hetan servisu iha Dili liu husi programa refere kria kampu servisu ba povu sira.

“Ami hakarak programa $3.00 governu tenke kontinua labele para iha ne’e deit tanba bele kria servisu ba ami povu sira iha Dili laran,” dehan Alberto de Jesus husi aldeia Terus Nain Suku Kolmera BT iha Vila Verde, terxa semana liuba. Tuir nia katak husi projetu $3.00 laos atu estraga maibe bele hadia dezenvolvimentu sidade laran tanba kapital presiza ho meiu ambiente ne’ebe moos atu labele kria moras ba iha komunidade sira.

“Ita labele laran metin deit ba iha walikota (traballador ba saneamentu) sira tanba sira hamoos foer mak dasa deit iha estrada ibun maibe duut sira nunka hamoos, tanba ne’e ami hanesan ajuda sira para bele hamoos liu tan duut sira iha sidade Dili laran,” afirma Alberto.Iha parte seluk Maria Luiza Freitas, husi aldeia Gedo Suku Vila Verde hatete ba implementasaun projetu $3.00 bele kria servisu ba povu sira ne’ebe ekonomia fraku hodi bele hetan osan liu husi programa refere atu hatan ba iha nesesidade uma laran.

“Hau simu ona osan terseiru idade maibe husi osan sira ne’e seidauk bele hatan ba hau nia nesidade uma laran. Husi servisu ida ne’e bele mos aumenta ba hau nia presiza uma laran,” dehan Maria.Nia mos informa katak servisu $3.00 realiza husi SEFOPE ne’ebe fo liu husi suku hodi povu halo rejistu iha suku hodi servisu durante semana rua kada grupu ida.

“Ami servisu hahu husi tuku walu no remata iha tuku haat ho balu durante loron neen nia laran hahu husi segunda feira- to’o iha sabadu,” informa nia.Tuir Observasaun BT iha distritu Dili ba projetu $3.00 ne’ebe implementa naklekar katak labarik barak mak partisipa hodi halo servisu ba iha projetu refere no mos balun la alista naran tanba la hetan informasaun husi xefi suku no xefi aldeia sira.(R-3)