DILI-Diresaun Nasional Transporte Terrestre (DNTT) sei mantein ho tarifa tranporte hahu husi diresaun 01 to’o 010 iha sidade Dili laran. Pasajeiru transporte publiku hanesan mikrolet, ba estudante nafatin selu centavos 10, no ba komunidade ka pasajeiru baibain centavos 20.Diretor DNTT Silvestre de Oliveira,L.Ed informa lia hirak ne’e ba Business Timor, Tersa (19/06) iha repartisaun DNTT Balide Dili relasiona ho preokupasaun kompañia transporte no mos pasajeiru sira nian ba folin mina nebe sa’e no tun.

Hare ba fluktuasaun folin minasunuk ne’e, wainhira enkontru DNTT ho reprezentante estudante, kondotor, hato’o sira nia halerik ba DNTT atu hato’o ba iha Ministeriu Infastrutura.Tuir Silvestre, surat haruka ona ba iha MI, DNTT hein deit despaisu husi MI hodi halo sosializasaun no fahe ba estudante sira atu hodi implementa, dehan Director DNTT ne’e.Diretor hateten hein deit semana ida ka rua nia laran despaisu husi MI tun ba DNTT sei informa ba media atu publika ba publiku atu nune’e bele implementa hodi muda tarifa transporte publiku ne’ebe sein iha baze legal.

DNTT seidauk iha planu konaba kareta ba estudante, maibe wainhira husi eskola ruma mak halo pedidu mai katak sira hakarak atu husu lisensa konaba bis eskola nian, DNTT sei fo, informa diretor.“Konaba transporte publiku se maka hakarak halo pedidu mai,husi DNTT simu ,maibe kona ba transporte privadu sira sei la simu,” nia hatete.Konaba tarifa transporte uluk husi DNTT fo sai ona dehan estudante sira selu 0,10 sentavos no komunidade 0,20 sentavos. Maibe realidade estudante sira hasoru lor-loron tun kondutor sira sempre husu selu $0,25.

Diretor hateten ida ne’e hatudu dehan selu baze ilegal tanba laiha lei ida konaba estudante selu 25 sentavos.“Ami nudar governu tenki regulariza lei, nee mak ami husi DNTT rona halerik husi fatin rua hanesan pasajeirus no kondutor sira nia aspirasaun hato’o ona ba iha ministeriu infra-estrutura hodi hein deit atu selu taxa ba transporte publiku,” dehan director DNTT. Entertantu senadu estudante Universidade da Paz Yohanes Fatima, no Januario da Silva husi DIT hateten beibeik ona kondutor hasa’e folin tarifa tuir sira nia hakarak hodi la bolta osan restu wainhira estudante sira fo osan $0,25.

“Ba ami nudar estudante senti triste tebes wainhira kondutor sira hasa’e beibeik folin tarifa, tanba ami ne’e barak mak dok husi inan aman. Husu ba kondutor karik bele fo estandar tarifa ba ema servisu bele selu $0.25 no ba estudante selu $0.10 kada ema ida,” informa Yohanes.Iha fatin seluk Fernando Castro komunidade hatete nia mos preokupa tebes wainhira nia oan sira hateten lor-loron selu $0.25 beibeik entaun fo impaktu boot ba sira ne’ebe ho rendimentu ki’ik dudu oan ba eskola.

“Ami povu ho rendimentu ki’ik haruka oan sira ba eskola maibe karik lor-loron mak selu bemo $0.25 bei-beik entaun ami senti ne’e labele tanba ba mai loron ida $0.50 ba osan transporte,” Mariano Castro dehan ba BT Kuarta (20/06) semana liu ba iha Manleuana.Marito da Costa kondotor transporte publiku diresaun 05 hateten sira sei la tula pasajeiru tanba mina agora dadaun sa’e hanesan bensin $1,24 gazoel $1,21, ne’ebe sira seidauk tula pasajeirus tanba ho rezaun mina folin sa’e.

“Husu ba governu atu kontrola folin konvustivel iha Pertamina laos koalia deit politik maibe la hare povu nia moris,” dehan Marito.Mariano de Jesus mos hateten halo konfirmasaun ba kondutor sira sobre assuntu tarifa maibe hasa’e folin tarifa ne’e laos kondutor hotu-hotu maibe balun ne’ebe la kompriende mak husu $0.25 ba estudante sira.Konditor sira ne’ebe lakompriende la bolta wainhira estudante selu U$ 0.25 maibe ba ema seluk estudante sira selu U$ 0.25 tenki bolta fali U$ 0.15 karik laos estudante entaun konditor hotu-hotu la bolta bainhira selu U$ 0.25 dehan Mariano.

Tuir estudante Universidade Nasional Timor Lorosa’e (UNTL) Norberto da Costa Hornai fakultas ekonomia hateten nia senti triste tanba wainhira tun kondutor husu 25 sentavos.“Uluk husi DNTT fo sai ba tranporte publiku dehan katak estudante tun selu 10 sentavos, komunidade 20 sentavus maibe agora dadaun kondutor sira husu hotu-hotu tenki selu quarter,” informa Norberto ho triste.

Iha parte seluk Kondutor diresaun 010 Jose Stalonne hateten nia la sastifas ho regra ne’ebe DNTT fo sai tanba diresaun dook hahu husi Tasi tolu ba to’o Bidau. Pasajeiru baibain selu deit 10 sentavos ida ne’e halo sira lasastifas.“Tuir lolos DNTT hasai regulamentu ba transporte publiku ba komunidade tun tenki selu 25 sentavos ba estudante tun tenki 15 sentavos, tanba ita hare agora dadaun mina sa’e no diresaun mos dook,” Jose halerik.(R-4)