AILEU-Komunidade suku Seloi Kraik subdistritu Aileu Vila distritu Aileu duranti ne’e seidauk hatene no senti telekomunikasaun nia diak mak oinsa tanba to’o ohin loron suku ne’e rasik seidauk asesu rede telekomunikasaun.Kompania telekomunikasaun ne’ebe hanaran Timor Telecom (TT) ejisti iha nasaun foun ne’e iha tinan 2002 hanesan telekomunikasaun uniku la iha kompetisaun husi telekomunikasaun seluk.

Iha dalan publiku kuaze espanduk kompania ne’e nian dada lemo lemo no hatete katak kliente agora dadaun hamutuk 98% mak asesu ona ba rede telekomunikasaun.“Ita atu telefoni ita sei buka fatin ne’ebe mak iha rede hodi nune ita bele kontaktu, maibe iha ne’e iha fatin balun fali defisil tebes atu asesu ba linha telefoni,” dehan Xefi Juventude Suku Seloikraik Sub-Distrito Aileu Vila Distritu Aileu Jeca Boavida iha dadalia ho jornalista Business Timor iha nia hela fatin.

Nune’e mos Professor Ekonomia Pre-Secundaria Seloikraik Paulino Fernandes katak TT sempre halo promosaun iha spanduk ka fo sai iha jornal katak TT nia kliente oras ne’e daudaun atinji ona 600 resin maibe nia parte lamenta tanba iha area rurais sira seidauk asesu senti benefisiu husi telekomunikasaun ne’e rasik“Hau lasastifas ho Timor Telecom nia promosaun oin-oin ne’ebe mak sira fo sai tanba realidade ne’ebe mak ita hare iha area rural ne’eba laiha tanba iha foho wainhira ita atu telefoni urjenti ita tenki halai ba buka linha telefoni selae telephoni labele tama tanba laiha linha hanesan,ne’e ita sosa pulsa $2,00 to’o $5,00 laiha folin,tanba telefoni derepenti linha lakon pulsa ne’ebe mak ita ense ne’e hotu kedan,”dehan Fernandes.

Tanba ne’e nia husu ba governu presiza hare no hadia lalais lei liberalizasaun ne’ebe agora iha ona meja PN,nune’emos kompanhia ne’ebe mak toma konta kona ba Telekomunikasaun labele halo manipula demais hanesan,TT ida agora dadaun halo ba nia kliente sira. 
Tuir nia katak ema primeiru ne’ebe mak halo KKN ne’emak TT nia parte husu ba governu atu halo investigasaun tanba pulsa ne’ebe mak sira fa’an $5,00 ou $1,00 telefoni laoras deit,afinal rendementu povu ki’ik loron ida hetan 0,5 sent deit mos atu tama arska nune’e mos nia senti triste tanba agora besik ona tama eleisaun Parlamentar maibe povu ne’ebe mak hela iha area rural sei infrenta problema tanba linha telefeoni laiha.

Ba nia ida ne’e eventu ida ne’ebe mak importante tanba ne’e presiza informasaun ida ne’ebe mak lais atu iha altura ne’e ita bele hatene direitamente saida mak akontese iha area rural”dehan Fernandes Iha parte seluk Estudante UNPAZ fakuldade Saude Publika Adelio Miguel ne’ebe durante semana rua halo pratika eskola nian iha area refere konfesa katak nia parte senti kontenti ho prezensa TT iha TL maibe nia husu atu habelarlitan linha TT nian atu nune komunidade nasaun ne’e hot hotu senti ninia benefisiu.

“Hau senti kontenti ho prezensa Timor Telekom iha ita nia rain tanba ne’e hau husu atu sira habelar liutan sira nia redi telekomunikasaun,”informa Adelio.Nia mos lamenta kona ba programa TT hanesan loke sorteu atu haruka nia kliente sira halo kompetisaun tanba to ohin loron nia parte rasik seidauk hare nia maluk ida mak hetan premiu husi sorteu ne’ebe TT fo sai to ohin loron.

Nune mos nia prte husu ba governu atu halo avaliasaun lalais ba kompaÑia seluk ne’ebe oras ne’edaudaun hatama ona ninia dokumentus ba governu atu tamatan mai halo kompetisaun iha area telekomunikasaun relasiona ona lei liberalijasaun ne’ebe governu aprova ona hodi loke dalan ba kompañia seluk atu tamatan mai investe iha nasaun foun ne’e hodi bele halo kompetisaun iha area telekomunikasaun.(R-4)