DÍLI----Ministru Prezidenti Konsellu Ministru (MPKM) Fidelis Leite Magalhães informa, Governu liu husi reuniaun Konsellu Ministru (KM) ne'ebé aprova ona mobilizasaun ba nasaun internasionál sira, hodi fó apoiu ba Governu Timor-Leste, ne'ebé mak dau-daun ne'e infrenta hela inundasaun.

“Konsellu Ministrus deside atu aprova mobilizasaun apoiu internasionál hodi hatán ba impaktu sira inundasaun nian iha loron 4 fulan-abril tinan 2021 liubá,” Hateten MPKM Fidelis Leite Magalhães hafoin remata enkontru ho Konsellu Ministru ba Jornalista sira iha Palásiu Governu, Kinta (08/04).

Nia hatutan, Asuntu ida ne'e Ministra Negósiu Estranjeiru no Kooperasaun (MNEK) mak seí koordena no nasaun sira seluk iha liur, hodi bele mobiliza apoiu internasionál posivel, nune'e bele fó sira nia apoiu Timor-Leste hodi bele rekopera. Kona-bá mobilizasaun apoiu husi internasionál, Governu iha Timor-Leste dehan de'it, deklarasaun ba kalamidade ita loke atu simu hodi halo mobiliza apoiu internasionál lori mai iha ita-nia rai.

Fidelis salienta, Tipu ba apoiu ne'e depende ba nasaun sira ne'ebé mak hakarak atu fó, balun fó apoiu tékniku, balun fó elikoptru atu bele transporta ba Munisípiu sira, balun fó rekursu, balun bele fó osan, balun bele fó konstrusaun, kolabora ho Timor-Leste atu bele rekonstrusaun. Ita labele husu tenki fó apoiu ida ne'e ho ida ne'e, maibé ita hatene iha komponente rua no tolu mak ita fahe, ida mak apoiu emerjensia imediata, sukoru no ajuda sira ne'ebé mak agora iha.

Segundu mak atu evita, nune'e labele iha kólera, Kovid-19 hodi labele hada'et liu tan no labele iha moras sira seluk, no kontribui ba komunidade sira nia bens estar, hanesan uma, nutrisaun. Alende ne'e mós Konsellu Ministru aprova ona projetu Rezolusaun Governu nian, ne’ebé nomeia António dos Santos de Matos, nu’udár Diretór Ezekutivu ba Institutu Peskiza, Dezenvolvimentu, Formasaun no Promosaun Bambu, IP nian, ba períodu tinan 3. Projetu Rezolusaun Governu nian ne’e aprezenta husi Ministru Agrikultura no Peskas, Pedro dos Reis. (BT)