Ba leitór sira jornál Business Timor nian, ita hasoru malu fali iha semana daruak ka inisiu tinan 2014 nian hafoin ita pasa tinan tuan 2013 nian. Ho tinan foun 2014 ne’e, serteza ita hotu hakarak buat foun iha ita nia moris. Hahu hosi hatais roupa foun, uma foun, kareta foun, no sasan fiziku sira seluk ne’ebé ita hakarak foun hotu. Ita ida-idak iha mehi hakarak ita nia moris ne’e bele nakfila sai foun iha tinan foun ne’e nia laran.

Maibé ita mós lakohi buat ne’ebé nakfila iha tinan ne’e iha parte fiziku deit hanesan temi balu-balu daudaun ne’e. Presiza liu mak hanoin foun, mental foun hodi hamosu ideia foun ne’ebé soi valór ba ita-nia moris di’ak. Iha biban ida ne’e ita foti reflesaun ba hanoin pozitivu hodi hamosu inovasaun hosi grupu joven ne’ebé harii sentru resiklajen plástiku iha Manleuana. Ita merese apresia ba sira nia hanoin ne’ebé inovativu hodi nakfila lixu fo’er sai ba produtu seluk ne’ebé util iha ita-nia nesesidade moris.

Inovasaun hafoun fali sasan aat no fo’er ne’ebé ema seluk soe, ate balu soe arbiru deit iha fatin sira ne’ebé la merese soe lixu nian ne’e buat foun ida ne’ebé durante ne’e timoroan sira seluk la hanoin. Ne’e duni ideia hosi José Deolindo Cs ne’e hanesan inovasaun foun ida tanba sai pioneiru ba timoroan sira seluk ne’ebé nunka hanoin kona-ba ne’e Ideia foun hanesan ne’e mak ita presiza hamosu iha tinan foun ida ne’e.  Karik iha tina liuba ita iha ona ideia atu halo investimentu ruma, iha tinan ne’e ita bele implementa daudaun ona. Karik iha tinan liuba ita hetan inspirasaun hosi figura susesu sira iha mundu oinsa hakat ba oin ho vida fila-liman ne’ebé sai susesu no boot, ita mós bele la’o tuir sira-nia ain-fatin.

Ita tenke iha komitmentu ida katak se ema seluk bele, ita mós  bele. Ita mós lakohi ita nia moris ne’e depende total ba ema seluk. Maski dala balu ita presiza hetan apoiu duni hosi parte seluk, la signifika ita hein de’it ema seluk lolo-liman hela de’it nune’e mai ita. Buat ne’ebé ita hetan tanba kontribuisaun ema seluk nian mai ita ladun signifikante no halo ita orguillu. Ita sente orguillu tebes tebes bainhira buat ne’ebé ita hetan mai husi ita nia kosar-been rasik. Maski ki’ik no simples tebes ba mós ita ita sei nafatin orguillu tanba ita rasik mak kria, ita rasik mak hamosu buat foun. Ksolok Natal no Kmanek Tinan Foun 2014 ba ita hotu, hein katak tinan foun 2014 sei fo grasa wa’in mai ita hotu.***

Kakein:
“Iha  2014 governu hanoin atu fo kreditu ba agrikultor, ha’u husu para utiliza kreditu ne’e ho di’ak no dezenvolve imi nia an liu hosi kreditu ne’ebe sira sei asesu, ita bele ajuda governu hamenus importasaun no ajuda governu hatun inflasaun.”

Brigida Antonia Correia
Membru Komisaun D Parlamentu Nasional
Business Timor edisaun 187

Lali’an:
* Lei  servisu  infantil  aprova ona  iha  Konsellu Ministru
- Labarik sira sei nafatin halo servisu 
* Fretilin krítika fo Prezente Natal  ba Deputadu sira
- Loos Na’i, saseluk povu nian labele buka di’ak de’it
* Feira hanorin vendador buka osan rasik
- Maski la hanoin mos durante ne’e sira buka rasik
* SEK husu komunidade labele harii uma privadu  iha Merkadu Taibesi
- Timoroan kuandu ita mamar liu sira nia ulun toos ba beibeik