Iha semana rua liubá, ensinu superior Dili Institute of Technology halo graduasaun ba estudante sira ne’ebé remata sira nia estudu iha kampus DIT Manleuana. Reitór DIT nian Ir. Estanislau Saldanha iha ninia diskursu husu bá governu no parlamentu nasionál tenke tau investimentu boot iha area edukasaun. Investimentu ne’ebé nia prefere mak ba rekursu umanu iha edukasaun hanesan hadi’a kapasidade  mestre ka dosente sira, kualidade  kurikúlu no  mós kualidade fasilidade. Atu hetan kualidade diak presiza investimentú ne’ebé boot, maibe infelismente investimentu ba edukasaun iha nasaun foun ne’e ki’ik  tebes  la  to’o pursentu 10 hosi  orsamentu tinan-tinan. Nune’e afeta ba kualidade ensinu mos ki’ik. Ne’e tuir reitor ne’e, la’ós tanba  ita nasaun  foun maibé  tanba ita nia governu seidauk  fó  prioridade  boot bá edukasaun.

Iha alokasaun orsamentu jeral estadu tinan-tinan hahu tinan 2011 governu aloka Fundu Dezenvolvimentu Kapital Umana ho total orsamentu millaun $25, tinan 2012 aumenta ba millaun $30, no tinan 2013 ne’e ho restu osan hosi 2012 nian kuaze millaun $42 resin. Fundu Dezenvolvimentu Kapital Umana ne’e aloka ba ministeriu ka sekretaria estadu sira hodi halo formasaun profisional, no bolsa estudu ba eskola sira tantu iha rai li’ur nno mos rai laran. Hosi orsamentu fundu dezenvolvimentu kapital umana ne’e, alokasaun ba ministeriu edukasaun, pursentu 10 deit.

Ne’e hatudu katak politika governu nian ne’e la fo prioridade ba investimentu iha area edukasaun. Kapasitasaun rekursu umanu ba edukasaun mos fo liu prioridade ba Universidade Nasional Timor Lorosa’e ne’ebé konsidera ensinu superior publiku. Entretantu ensinu superior sira seluk ne’ebé konsidera privadu ladun hetan prioridade no ida-idak tenke esforsa an rasik atu kapasita ninia rekursu. Ita apresia ba ensinu superior privadu sira ne’ebé halo ona esforsu oioin hodi eduka timoroan sira, sai ema matenek ka edukadu maski hasoru difikuldade oioin. La sente katak sira fo kontribuisaun ba dezenvolvimentu nasaun ne’e hodi prepara rekursu umanu. Ne’e duni governu no estadu merese atu hanoin mos halo investimentu iha ensinu superior  hotu-hotu sein halo diskriminasaun entre ensinu superior publiku no privadu. Hein katak governu no estadu bele loke neon hodi toma konsiderasaun ba investimentu area edukasaun.***

Kakein:
“Ita hotu kontinua defende ita-nia nasaun, fó liman ba malu hodi hadi’a no proteje ita nia rain ida ne’e hodi hasoru ameasa hotu-hotu, liu-liu hasoru kiak no mukit.”

Taur Matan Ruak
Prezidente Repúblika
Business Timor edisaun 184

Lali’an:
* Governu-PN tenke tau investimentu boot bá edukasaun
- Ba sira, investimentu mak dolar ho prado iha laran, dolar semo tun-sae iha li’ur    
* Hamenus kuantidade importasaun kareta mai TL
- Susar tanba ita merkadu livre, taxa livre, parkir livre, macet mos livre
* Sistema pagamentu  haterus servidor estádu
- Diak mos tanba bele fo razaun ba funsionariu hodi avandona servisu