Programa Povu Kuda Governu Sosa nebe trasa ona iha tempu governu anterior liu hosi ministeriu turizmu komersiu no industria (MTCI) ikus mai la hatudu benefisiu nebe diak ba programa hasa’e produtu lokal liu-liu seguransa aihan. Governu aloka tiha osan barak millaun ba millaun hodi sosa aihan produtu lokal hanesan hare, batar, koto, fore no seluk tan, maibe husik produtu hirak ne’e sai fuhuk deit iha armajen.

Hirak ne’e akontese tanba hala’o programa ne’e sein iha koordenasaun diak ho ministeriu relevante. Laiha mekanismu nebe diak oinsa produtu hirak nebe governu sosa ne’e bele benefisia ba ema barak. Loloos ne’e governu halo uluk peskiza ida oinsa produtu lokal ne’e bele tama iha merkadu ho folin nebe baratu liu kompara ho aihan importadu. Se la nune’e mak produtu lokal labele kompete ho produtu importadu nebe muda ona mentalidade ita nian hodi gosta liu produtu hosi li’ur duke produtu hosi ninia rain rasik.

Planu ba merkadu ne’e tenke iha atu nune’e labele rai kleur iha armajen. Tanba laiha planu merkadu nebe diak, no mos laiha informasaun ba publiku kona-ba produtu lokal sira nebe rai iha armajen, halo aihan produtu lokal ne’e labele konkista konsumidor nia laran, satan konsumidor fo stigma ba ita nia produtu rai laran ne’e nia kualidade ladun diak.   Ho esperiensia ida ne’e ita espera katak ministeriu komersiu industria no ambiente (MCIA) foti nudar referensia atu nune’e muda mekanizmu ho paradigma foun ba politika valoriza ita nia aihan lokal.

Osan povu nian nebe fakar ba sosa produtu lokal ne’e labele saugati deit no povu agrikultor nebe hisik kosar been rasik hodi halo produsaun iha rai laran bele hetan valor netik. Osan povu nian nebe uza ba hodi sosa povu nia produtu rasik tenke iha vantajen no fo benefisiu ba timoroan rasik. MCIA ohin loron tenke nakloke ba publiku atu hatene liu hosi promosaun produtu local hirak ne’e ho meius oioin inklui fo informasaun aberta ba media komunisaun social.***

Kakein:

“Labele sai fali hanesan esperiensia uluk produtu iha armajen sai dodok, mais ita nia povu kontinua hamlaha.”

Jacinta Pereira
Presidente Komisaun D Parlamentu Nasional Asuntu Ekonomia no Dezenvolvimentu
Business Timor, Edisaun 165

Lali’an:
* Povu Kuda Governu Sosa husik aihan fuhuk iha armajen
- Ne’e katak povu kuda governu budu ho diak
* KPK Indonesia sujere haforsa Lei KAK
- Uluk kedas ita hatete KAK laiha nehan
* SEPFOPE ajuda grupu indústria ki’ik
- Ne’e hanesan karakter lekirauk nian gosta sabotase