Iha semana liuba, governu liu hosi Administrasaun Distritu Dili no Diresaun Nasional Rai no Soin halo eviksaun ka hasai obriga populasaun nebe hela iha eis otel Resende. Residente sira iha fatin ne’e maioria estudante. Prosesu atu hasai populasaun hirak ne’e kleur ona. Hahu hosi verifikasaun ba dadus ema hira mak hela iha fatin refere ho tempu sira hela ne’e hori bainhira.  Tuir verifikasaun nebe iha, governu konklui katak sira barak mai hela iha ne’e hafoin akontese krize 2006 nebe balu simu tiha asistensia umanitaria, depois mai hela fali iha eis otel Resende ne’e. Tanba okupa propriedade estadu nian, no governu presiza atu haluan edifisiu Banku Sentral, husu ba populasaun sira atu sai hosi fatin ne’e voluntariamente. Hanesan Administrador Distritu Dili hatete ba media sira katak governu fó notifikasaun no avizu fila fila ona husu populasaun sira hamamuk fatin ne’e maibé tanba la kumpri governu hasai despaixu hodi hasai obrigatóriu.

Iha parte sira nebe hetan eviksaun liu-liu estudante sira deklara katak governu nunka fó karta notifikasaun ba sira, deklarasaun ida nebe atu defende an deit hodi ezije nia interese rasik. Nudar estudante calon intelektual, loloos iha ona hanoin luan katak estudante iha Dili laran mai hosi distritu sira la’os deit sira nebe hela iha eis otel Resende maibe estudante rihun ba rihun mak hela iha Dili laran, aluga uma hodi esforsu an oinsa bele estuda didiak buka matenek. Bainhira governu haree deit grupu estudante balu deit, ne’e hanesan halo diskriminasaun ba nia sidadaun estudante sira maioria nebe hela iha Dili laran ho sira nia esforsu rasik.

Nudar estudante tenke iha mos sentimentu solidariedade ba maluk estudante sira seluk nebe nunka ezije buat ida ba governu atu kria kondisaun diak ba sira hodi kontinua estudu iha Dili. Maski ho kapasidade ekonomia nebe minimu mai hosi distritu, estudante barak mak buka fatin rasik sein halerik ba governu. Sira iha konxiensia atu labele buat hotu ki’ik boot ezije ba governu deit tanba nudar sidadaun ida sira lakohi egoista tanba ema barak mak sei moris susar hanesan mos ita.***

Kakein:
“Agrikultor sira produs aihan atu konsumu ba sira nia an tanba la iha ligasaun ba merkadu no ida ne’e halo povu lakon sira nia inisiativa atu hasae sira nia produsaun.”

Yoshitaka Hanada
Embaixador Japaun ba Timor Lorosa’e
Business Timor Edisaun 164


Lali’an:
TL kiak iha potensia agrikola nia leten
Ne’e dezafia ministeriu agrikultura no peska
Mentalidade konsumidor la valoriza produtu lokal
Ne’e tanba aihan hosi li’ur hipnotis tiha timoroan haluha an
Eviksaun eis Resende nunka prepara kondisaun di’ak
Ita mos tenke hanoin maluk sira seluk nebe nia kondisaun la diak liu ita