Movimentu Suku Ida Produtu Ida (SIPI) hanesan programa inovasaun hosi Japaun nebe implementa ona iha nasaun barak inklui iha Timor Leste. Tuir programa SIPI nebe introdus hosi Japaun ne’e iha pilar tolu importante mak hanesan primeiru foka ba dezenvolvimentu ekonomiku la’os deit iha area urbana maibe mos iha area rural. Ekonomia iha area rural sira tenki dezenvolve ho inisiativa espontania hosi populasaun rasik, no produtu lokal sira tenki ligadu ho merkaduria lokal no mos iha nasaun laran tomak. Programa SIPI iha Timor Leste, ho objetivu atu hasa’e kresimentu ekonomiku iha teritoriu tomak, tantu area urbana no mos rural sira. Saida mak akontese daudaun iha ita nia rain ba kresimentu ekonomia nian, Embaixador Japaun ba Timor Leste Yositaka Hanada hafanu ita atu hader no matan moos hateke ba ita nia rain to’o ohin loron dezenvolvimentu sei konsentra iha kapital Dili no ema hotu-hotu tenki halai hotu mai buka moris iha sidade Dili.

Movimentu SIPI ne’e atu ajuda timoroan promove dezenvolvimentu nasaun nian husi baze hodi loke kampu servisu iha baze no dada timoroan dezenvolve nia produtu rasik. Agrikultor sira produs aihan laiha orientasaun ba merkadu maibe atu konsumu ba sira nia an deit, katak laiha ligasaun ba merkadu, ho nune’e halo povu lakon sira nia inisiativa atu hasae sira nia produsaun.  Ne’e duni, ita hotu tenke esforsa an atu implementa programa SIPI ne’e iha suku tomak tuir potensia ida-idak nian atu dezenvolve. Nune’e kresimentu ekonomia Timor Lorosa’e nian agora labele Dili deit mak sente maibe iha area rural mos povu sira sente dezenvolvimentu ekonomia.

Movimentu SIPI ne’e presiza apoiu hosi entidade tomak liuliu parte governu. Presiza liña koordenasaun diak entre ministerial hanesan ministeriu agrikultura no peska, ministeriu komersiu industria no ambiente, ministeriu transporte no komunikasaun, ministeriu obras publiku. Ho koordenasaun nebe diak mak SIPI bele hala’o ho diak. MAP tenke fo motivasaun ba agrikultor sira produs material prima, MCIA tenke dudu programa industria no jestaun merkaduria ba SIPI oinsa timoroan rasik iha neon hakarak uza produtu local sira, MOP tenke harii infaestrutura hanesan estrada diak to’o iha area rural, no MTK tenke iha programa oinsa povu bele asesu ho fasi transporte no komunikasaun.

Ho nune’e ita hein katak ita nia kresimentu ekonomia la’os sente deit iha Dili laran maibe mos iha area rural sira. Produtu lokal sei sai ai-riin ba dezenvolvimentu ekonomia ita nia rain no minimiza dominasaun produtu importasaun hosi li’ur.***  

Kakein:
“Ami servisu atu halo supervizaun ba area finanseiru hotu-hotu atu promove kredibilidade iha setor privadu. Banku Central Timor-Leste agora dadauk dezenvolve hela projetu ida ne’ebe ami bolu planu global ba setor finanseiru ne’ebe buka atu kria ambiente ne’ebe diak atu bele fo kreditu hodi nune bele promove kresimentu ekonomiku no atu kria empregu.” 

Dra. Nur Alkatiri
Vise Kordenador Banco Central de Timor Leste
Business Timor Edisaun 163

Lali’an:
Kresimentu ekonomia rapidu iha Dili deit
Ita tenke dulas kakutak hodi rezolve
Kondisaun estrada distritu Oe-Cusse át
Ne’e lagu lama MOP nian
Setór privadu sei fraku atu kompete iha ASEAN
Se nune’e bele oho an tama ASEAN